खुटबाव, ता. १८ ः शेतकऱ्यांना अधिक पाणी मिळावे, यासाठी उजनी धरणाच्या बॅकवॉटरमध्ये बुडीत बंधारे, तसेच मुळा, मुठा व भीमा नदीवर स्वयंचलित व कोल्हापूर पद्धतीच्या बंधाऱ्यांची मागणी दौंडचे आमदार राहुल कुल यांनी मुंबई येथे पावसाळी अधिवेशनात लक्षवेधी विचारताना केली. यावेळी आमदार कुल म्हणाले की, ‘‘दौंड तालुक्यात ३३०० हेक्टर पाझर क्षेत्र आहे. एकूणच दौंड तालुक्यात मोठ्या प्रमाणात पाझर क्षेत्र आहे. पाझरचर व बंदिस्त पाझरचरसाठीचे मापदंड ठरविण्याचे प्रस्ताव विधी व न्याय विभागाकडे सादर केले असून, या प्रस्तावांना मान्यता मिळावी. तसेच, कालवा लाभक्षेत्राबाहेरील शेतकऱ्यांची २० टक्के लोकवर्गणीची अट रद्द करावी. खडकवासला- फुरसुंगी बंदिस्त कालवा प्रकल्पाचे काम तातडीने सुरू करून निश्चित मुदतीत पूर्ण व्हावे. दौंड तालुक्यातील जिरायती शेतकऱ्यांसाठी जनाई शिरसाई योजनेचे काम त्वरित सुरू करण्यात यावे.’’ यावर जलसंपदा मंत्री राधाकृष्ण विखे पाटील यांनी सर्व मागण्या सकारात्मकपणे स्वीकारत, त्वरित कार्यवाहीचे आश्वासन दिले आहे.