लोणी देवकर, ता. १५ ः जिल्हाधिकारी पुणे यांच्या निर्देशानुसार दर महिन्याच्या तिसऱ्या सोमवारी लोकशाही दिन साजरा होणार आहे. त्या अनुषंगाने १६ जून रोजी इंदापूर तालुक्यातील वरकुटे पाटी येथील माऊली प्रसाद लॉन्समध्ये लोकशाही दिनाचे आयोजन शासनाच्या वतीने केले आहे. शासनाच्या विविध योजना आणि सेवा नागरिकांपर्यंत पोहोचविण्यासाठी, तसेच नागरिकांच्या तक्रारींचे निवारण करण्यासाठी लोकशाही दिन साजरा करण्यात येणार आहे. यामध्ये शासनाच्या सर्व विभागाचे अधिकारी अथवा त्यांच्या कार्यालयाचा प्रतिनिधी उपस्थित राहणार असून, नागरिकांच्या समस्या जाणून घेऊन त्याचे निराकरण करणार आहेत. मंडल कार्यालय लोणी देवकर अंतर्गत येणाऱ्या लोणी देवकर, भावडी, चांडगाव, बळपुडी, वरकुटे बुद्रुक, अगोती, कळाशी, गंगावळण, राजवडी, बिजवडी गावातील नागरिकांनी या कार्यक्रमास उपस्थित राहत आपल्या समस्या मांडण्याचे आणि शासनाच्या विविध योजना विषयी माहिती घेण्याचे आवाहन तहसीलदार जीवन बनसोडे यांनी केले आहे.