लोणी काळभोर, ता. २४ : हवेली तालुक्यातील कदमवाकवस्ती ग्रामपंचायत हद्दीतील कवडीपाट टोलनाका परिसरात विवाहसमारंभासाठी आलेल्या एका तरुणावर तिघांनी कोयत्याने हल्ला करून गंभीर जखमी केल्याची घटना सोमवारी (ता. २०) रात्री साडेदहाच्या सुमारास घडली. याप्रकरणी लोणी काळभोर पोलिस ठाण्यात तिघांविरोधात गुन्हा दाखल करण्यात आला आहे.
आकाश सूर्यकांत पवार (वय २८, रा. वेताळबाबा वसाहत, हडपसर) असे जखमी तरुणाचे नाव असून त्यांनीच फिर्याद दिली आहे. सुरेश बाबूराव गायकवाड (वय १८), कुणाल राहुल चौगुले (वय १८) आणि शुभम धर्मा सोलंकी (तिघे रा. कदमवाकवस्ती, ता. हवेली) असे गुन्हा दाखल करण्यात आलेल्यांची नावे आहेत. दरम्यान, जखमी अवस्थेत त्यांनी लोणी काळभोर पोलिस ठाणे गाठले. पोलिसांनी तत्काळ त्यांना ससून रुग्णालयात उपचारासाठी पाठविले. उपचारानंतर प्रकृती स्थिर झाल्यावर त्यांनी पोलिसांत तक्रार दाखल केली.