मंचर, ता.४ : केंद्र सरकारने कांद्यावरील २० टक्के निर्यात शुल्क रद्द करण्याचा निर्णय घेतला. तो एक एप्रिल २०२५ पासून लागू झाला आहे. मात्र, त्याची अंमलबजावणी अद्याप झालेली नाही. त्यामुळे शेतकऱ्यांमध्ये संभ्रम आहे. निर्यात शुल्क रद्द केल्यामुळे कांद्याच्या दरात सुधारणा होण्याची अपेक्षा आहे. परंतु अंमलबजावणीतील विलंबामुळे अद्याप दरात वाढ झालेली दिसत नाही. त्यामुळे कांदा उत्पादक शेतकऱ्यात नाराजी आहे.
मंचर (ता.आंबेगाव) कृषी उत्पन्न बाजार समितीच्या आवारात गुरुवारी (ता.तीन) सात हजार कांदा पिशव्यांची आवक झाली. दहा किलो गोळा कांद्याला १६० रुपये ते १७० रुपये बाजारभाव मिळाला. गेल्या १५ दिवसाच्या तुलनेत कांद्याचे बाजारभाव अजून स्थिर आहेत, अशी माहिती आंबेगाव तालुका कृषी उत्पन्न बाजार समितीचे सभापती नीलेश थोरात यांनी दिली.
आंबेगाव, शिरूर तसेच खेड तालुक्यात सध्या शेतकऱ्यांची कांदा काढणीची लगबग सुरू आहे. सध्या पाऊस पडण्याची शक्यता आहे. ज्या शेतकऱ्यांकडे कांदा बारखी नाही. त्यांनी कांद्याचे नुकसान होऊ नये म्हणून मंचर बाजार समितीच्या आवारात विक्रीसाठी कांदा पिशव्या आणण्यास सुरुवात केली आहे.
याबाबत कांद्याचे अडते व मंचर बाजार समितीचे माजी संचालक बाळासाहेब रंगनाथ बाणखेले म्हणाले, की केंद्र सरकारने कांद्यावरील २० टक्के निर्यात शुल्क रद्द करण्याची व ता. एक एप्रिलपासून अंमलबजावणीची घोषणा केली होती. मात्र, अद्याप कांद्याच्या बाजारभावात वाढ झाली नाही. निर्यात करणाऱ्या कांदा व्यापाऱ्यांकडून अजून मागणी आलेली नाही. त्यामुळे कांदा उत्पादक शेतकऱ्यांमध्ये संभ्रम निर्माण झाला आहे.”

दहा किलो कांद्याचे बाजारभाव पुढीलप्रमाणे : सुपर लॉट एक नंबर गोळा कांदा १६० ते १७०, सुपर कांदे १५० ते १६०, सुपर मीडियम कांदे १२५ ते १४०, गोल्टी कांदा ९० ते १२०, बदला/चिंगळी कांदा ५० ते ११०.

12911