मंचर, ता. २६ : ‘‘हृदयविकार हा आरोग्याचा गंभीर मुद्दा बनला आहे. हृदय निरोगी ठेवण्यासाठी फक्त औषधं नव्हे, तर जीवनशैलीतील सकारात्मक बदलही तितकेच गरजेचे आहेत. अतिताणामुळे आपल्याकडे ३० ते ५० वयोगटातील नागरिकांना हृदयविकाराचे प्रमाण वाढले आहे. त्यामुळे सर्वांनी हृदयाची काळजी घ्यावी,’’ असे आवाहन हृदयरोग तज्ज्ञ डॉ. हसमुख गुजर यांनी व्यक्त केले.
मंचर (ता. आंबेगाव) येथे शिवजयंती सांस्कृतिक महोत्सव २०२५ आयोजित लोकनेते किसनराव बाणखेले स्मृती व्याख्यानमालेच्या शुभारंभप्रसंगी शुक्रवारी (ता. २६) रात्री ‘वाढते हृदयविकार व वैद्यकीय उपचार पद्धती’ या विषयावर डॉ. गुजर बोलत होते. सुरुवातीला छत्रपती शिवाजी महाराज यांच्या पुतळ्याचे पूजन केले. अध्यक्षस्थानी लाला अर्बन बँकेचे अध्यक्ष युवराज बाणखेले होते. यावेळी उपाध्यक्ष जितेंद्र गुंजाळ, संचालक जे. के. थोरात, मुख्य कार्यकारी अधिकारी डी. एन. सुरम, दत्ता थोरात, उपाध्यक्ष प्रवीण मोरडे, संजय थोरात, राजाराम बाणखेले, बाळासाहेब बाणखेले, बाजीराव मोरडे, अश्विनी शेटे आदी उपस्थित होत्या.
कामगार नेते ॲड. बाळासाहेब बाणखेले यांनी प्रास्ताविक; तर व्याख्यानमालेचे कार्याध्यक्ष वसंतराव बाणखेले यांनी सूत्रसंचालन केले.

दररोज किमान ३० मिनिटांचा व्यायाम करवा. चालणे, सायकल चालवणे किंवा योगासारखे सौम्य व्यायाम हृदयासाठी फायदेशीर आहेत. ताज्या फळभाज्या, संपूर्ण धान्ये, कमी साखर व मीठ यांचा समावेश असलेला आहार हृदयाचे आरोग्य राखतो. धूम्रपान व मद्यपान टाळा. या सवयी हृदयावर घातक परिणाम करतात.
- डॉ. हसमुख गुजर, हृदयरोग तज्ज्ञ