मंचर, ता.१५ : मंचर शहर व परिसरातील सर्व भंगार व्यावसायिकांनी दुकानाच्या सभोवती सीसीटीव्ही कॅमेरे तातडीने बसवून घ्यावेत. तसेच दुकानाला भंगार साहित्य देणाऱ्यांची नावे व मोबाईल क्रमांकाची नोंदवही तयार करून अनोळखी किंवा संशयास्पद व्यक्ती वाटल्यास पोलिसांशी संपर्क साधा, असे आदेश मंचर पोलिस ठाण्याचे वरिष्ठ पोलिस निरीक्षक श्रीकांत कंकाळ यांनी दिले.
मंचर (ता.आंबेगाव) पोलिस ठाण्यात भंगार व्यावसायिकांसोबत झालेल्या बैठकीत कंकाळ बोलत होते. शेतकऱ्यांचे कृषीपंप, विजेच्या वाहिन्या आदि साहित्य चोरीच्या घटना वारंवार परिसरात घडत आहेत. सदर साहित्यांची खरेदी काही भंगार व्यावसायिक करतात. अशी तक्रार स्वाभिमानी शेतकरी संघटनेचे पुणे जिल्हा अध्यक्ष प्रभाकर बांगर यांच्या नेतृत्वाखाली शिष्टमंडळाने कंकाळ यांच्याकडे निवेदनाद्वारे केली होती.
या पार्श्वभूमीवर झालेल्या बैठकीत कंकाळ म्हणाले, याबाबत तातडीने उपाययोजना हाती घेतल्या आहेत. रात्रीची गस्त वाढवली आहे. भंगार दुकानदारांच्या दुकानातील साहित्याची वेळोवेळी तपासणी केली जात आहे. चोरट्यांचा शोध घेण्याचे कामही सुरु आहे.
...........................................................