मंचर, ता. १९ : अवसरी खुर्द (ता. आंबेगाव) येथील खडकवस्ती परिसरात राहणारे शेतकरी वसंतराव तुकाराम शिंदे यांच्या गोठ्यातील ७० हजार रुपये किमतीची गाय बिबट्याने केलेल्या हल्ल्यात मृत्युमुखी पडली आहे. या घटनेमुळे शेतकरी वर्गात भीतीचे वातावरण निर्माण झाले आहे. अनेक शेतकऱ्यांनी पशुधनाच्या सुरक्षेसाठी बंदिस्त लोखंडी जाळ्या उभारण्याचे काम हाती घेतले आहे.
गेल्या काही दिवसांत बिबट्याचा वावर वाढला आहे. गेल्या आठवड्यात आदर्शगाव गावडेवाडी येथे शेतकरी हनुमंत गावडे यांच्या ओट्यावरच बिबट्याने बैठक मारली होती. या भागातील अनेक कुत्री बिबट्याने फस्त केली असून अनेकदा दुचाकीवरून ये-जा करणाऱ्यावरही हल्ले झाल्याच्या घटना घडल्या आहेत. आता बिबट्याने गायींच्या गोठ्याकडे लक्ष केंद्रित केले आहे. या भागात ऊसाचे क्षेत्र मोठ्या प्रमाणात असल्याने बिबट्यांना लपण्यासाठी जागा मिळते. बिबट्याच्या दहशतीमुळे शेती कामकाजावर मोठा परिणाम झाल्याचे शेतकऱ्यांनी सांगितले. ‘‘बिबट्यांचा उपद्रव व दहशत रोखण्यासाठी मंचर वनपरिक्षेत्र कार्यालयाने तातडीने पिंजरा लावून बिबट्यांना जेरबंद करावे,’’ अशी मागणी सरपंच वैभव वायळ यांनी केली.