मंचर, ता. १९ : आंबेगाव तालुक्यातील मंचर, अवसरी खुर्द, एकलहरे, लांडेवाडी, निघोटवाडी, पिंपळगाव तर्फे महाळुंगे, श्री क्षेत्र वडगाव काशिंबेग, आदर्शगाव गावडेवाडी व सातगाव पठार परिसरातील २० गावे व वाड्यावस्त्यांवर गुरुवारी (ता.१८) दुपारी व शुक्रवारी (ता. १९) पहाटे मुसळधार पाऊस झाला. मंचर शहरात शुक्रवारी सकाळी सहा वाजेपर्यंत ३१ मि.मी. पावसाची नोंद झाल्याची माहिती महसूल खात्याकडून प्राप्त झाली आहे.
पहाटे विजेच्या कडकडाटासह पाऊस झाल्याने ज्येष्ठ नागरिक, लहान मुलांसह कुटुंबांमध्ये भयभीत वातावरण निर्माण झाले होते. ओढ्या-नाल्यांना पूर आले होते. रस्त्यावर व विशेषत: खड्ड्यांमध्ये पाणी साचल्याचा फटका वाहन चालकांना बसला.
जुना बैल बाजार, इंदिरा नगर याभागातील कौलारू घरे, पत्राशेडच्या घरांमध्ये व गुरांच्या गोठ्यात पाणी शिरल्याने अनेक कुटुंबांची व गोठा मालकांची धावपळ झाली. अनेक तरकारी पीक, सोयाबीन, मका, बीट आदी पिकांत पाणी साचले आहे. त्यामुळे अनेक शेतकऱ्यांना पिकांची तोडणी थांबवावी लागली. या पावसाचा नागरिक, शेतकरी व व्यवसायिकांना मोठा फटका बसला असून आता ‘पावसा-पावसा थांब रे’, असे म्हणण्याची वेळ आल्याचे मंचर येथील शेतकरी वसंतराव विष्णू बाणखेले यांनी सांगितले.