मंचर, ता. ६ : मंचर नगरपंचायतीच्या हद्दीत मोरडेवाडी जिल्हा परिषद प्राथमिक शाळेपासून अवघ्या २०० मीटर अंतरावर गुरुवारी (ता. ६) सकाळी ११ वाजता उजव्या कालव्यात पाणी पिणारा बिबट्या दिसला. संगणक शिक्षिका ममता त्रिवेदी व पालक शीतल बागल यांनी बिबट्याला पाहताच घाबरून आरडाओरडा केला. ग्रामस्थ व शिक्षकांनी तत्काळ फटाके वाजवत आवाज केल्याने बिबट्या जवळच्या मका शेतात पसार झाला. या घटनेची माहिती मिळताच वन खात्याचे कर्मचारी शाळा परिसरात दाखल झाले. परिसराची पाहणी करून येथे पिंजरा लावण्याची तयारी सुरू केल्याचे मंचर वनपरिक्षेत्र अधिकारी विकास भोसले यांनी सांगितले.