मंचर, ता.१९ : आंबेगाव तालुक्यातील मंचर, निघोटवाडी, लांडेवाडी, श्रीक्षेत्र वडगाव काशिंबेग,महाळुंगे पडवळ सह पूर्व भागातील ४५ गावे व तीस वाड्या वस्त्यांवर बिबट्याच्या वाढत्या वावरामुळे व दहशतीमुळे नागरिकांच्या दैनंदिन जीवनावर गंभीर परिणाम झाला आहे. कीर्तन-प्रवचन, सत्यनारायण पूजा, स्वागत समारंभ, तसेच सकाळ-संध्याकाळ व्यायामासाठी रस्त्यावर ये-जा करणारे ज्येष्ठ नागरिक, युवक-युवती यांच्यात भीतीचे वातावरण पसरले आहे. परिणामी धार्मिक व सामाजिक कार्यक्रमांची उपस्थिती मोठ्या प्रमाणात घटत चालली असून, ‘हा बिबट्यांचा प्रश्न कधी संपुष्टात येणार’, असा सवाल नागरिकांनी उपस्थित केला आहे.
सध्या तालुक्यातील अनेक गावांमध्ये जागृत देवस्थानांच्या यात्रा, उत्सव व अखंड हरिनाम सप्ताहांचे आयोजन केले जाते. या निमित्ताने सायंकाळी प्रवचन, रात्री कीर्तन व पहाटे काकडा असे कार्यक्रम होत असतात. या कार्यक्रमांना मोठ्या संख्येने भाविक सहभागी होत असतात. मात्र, बिबट्याच्या सावटामुळे, इच्छा असूनही संभाव्य दुर्घटना टाळण्यासाठी अनेक भाविकांनी सध्या या कार्यक्रमांपासून अलिप्त राहत असल्याची माहिती शंकर महाराज शेवाळे व संतोष महाराज बढेकर यांनी दिली. लग्नसमारंभानिमित्त शेतकऱ्यांच्या पूजा व स्वागत समारंभ धुमधडाक्यात सुरू असले तरी अपेक्षित नातेवाईक व ग्रामस्थ उपस्थित राहत नसल्याची खंत वर-वधूंच्या कुटुंबीयांनी व्यक्त केली आहे. सामाजिक आनंदाचे क्षणही भीतीच्या छायेत साजरे करावे लागत असल्याचे चित्र आहे. एकंदरीत, पूर्वी ग्रामीण भागापुरता मर्यादित असलेला बिबट्याचा प्रश्न आता शहरी भागातही तीव्र होत चालला आहे. लहान मुलांना सायंकाळी घराबाहेर खेळण्यासाठी पाठवणेही धोक्याचे वाटत असल्याची भावना पालक व्यक्त करीत आहेत. ‘‘रात्री नागरिकांनी प्रवास करताना काळजी कशी घ्यावी, या बाबतही प्रबोधन प्रवचन कीर्तनाच्या माध्यमातून केले जात आहे,’’ असे बाजीराव महाराज बांगर यांनी सांगितले. हा प्रश्न सामाजिक स्वरूप धारण करत असून, प्रशासन व वनविभागाने यावर कोणत्या ठोस उपाययोजना राबवणार, याकडे संपूर्ण तालुक्याचे लक्ष लागून राहिले आहे.
दरम्यान, मंचर परिसरात शासकीय अभियांत्रिकी महाविद्यालय, अण्णासाहेब आवटे महाविद्यालय, तपनेश्वर मंदिर परिसरात सकाळ-संध्याकाळ ज्येष्ठ नागरिक तसेच पहाटे युवक-युवती पायी चालत व्यायाम करतात. मात्र अलीकडे मंचर सारख्या शहरी भागातही बिबट्याचा वावर आढळून आल्याने असुरक्षित वातावरणात घराबाहेर पडणे धोक्याचे झाले आहे.
- डॉ. दत्ता चासकर, मंचर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.