मंचर, ता. १९ : मंचर नगरपंचायत निवडणूक मतमोजणी क्रीडा संकुलाच्या आवारात रविवारी (ता. २१) होणार आहे. त्यादृष्टीने प्रशासनाने जय्यत तयारी केली आहे. मतमोजणी परिसरात कायदा व सुव्यवस्थेसाठी ५० पोलिसांचा बंदोबस्त तैनात केला आहे. त्यामध्ये दोन पोलिस अधिकाऱ्यांचा समावेश आहे, अशी माहिती सहाय्यक निवडणूक निर्णय अधिकारी तथा मंचर नगरपंचायतीचे मुख्याधिकारी गोविंद जाधव यांनी दिली.
ते म्हणाले, ‘‘रविवारी सकाळी दहा वाजता मतमोजणी प्रक्रिया सुरु होईल. दुपारी बारा वाजेपर्यंत सर्व निकाल जाहीर होतील, असे नियोजन केले आहे. मतमोजणी प्रक्रियेत सहभागी होणारे उमेदवार, त्यांचे प्रतिनिधी व अधिकृत एजंट यांना सकाळी नऊ वाजता मतमोजणी केंद्रात प्रवेश दिला जाणार आहे. ओळखपत्रांची तपासणी करूनच त्यांना प्रवेश देण्यात येणार आहे. मतमोजणीसाठी अधिकारी व कर्मचाऱ्यांना प्रशिक्षण दिले आहे. पारदर्शक व शांततेत मतमोजणी प्रक्रिया पूर्ण होण्यासाठी दक्षता घेतली जाईल. सर्व उमेदवार व त्यांच्या प्रतिनिधींनी प्रशासनाला सहकार्य करावे.’’
‘‘दहा टेबलांवर मतमोजणी होईल. प्रत्येक टेबलवर अधिकारी व दोन कर्मचाऱ्यांच्या नेमणुका केल्या आहेत. तीन फेऱ्यांमध्ये मतदान मोजणी पूर्ण होणार आहे,’’ असे मंचर नगरपंचायतीचे कार्यालयीन अधीक्षक वरद थोरात यांनी सांगितले.