मंचर, ता. ५ : पिंपळगाव -खडकी (ता. आंबेगाव) गावच्या लिंबाचामळा परिसरात वनखात्याने लावलेल्या पिंजऱ्यात बुधवारी (ता. ४) पहाटे बिबट्या जेरबंद झाला. परिसरात अजूनही बिबट्यांचा वावर असल्याची शक्यता लक्षात घेऊन वन विभागाने त्याच ठिकाणी पुन्हा पिंजरा लावला असून नागरिकांनी सतर्क राहण्याचे आवाहन केले आहे. बुधवारी सकाळी मिळताच वनपाल सोनल भालेराव, वनरक्षक संपत तांदळे, वनसेवक जालिंदर थोरात व किसन पोखरकर यांनी घटनास्थळी जाऊन बिबट्याला ताब्यात घेतले. साधारण तीन ते साडेतीन वर्ष वयाचा हा नर बिबट्या असल्याचे प्राथमिक तपासणीत स्पष्ट झाले. वैद्यकीय तपासणीनंतर त्याला माणिकडोह बिबट निवारा केंद्र येथे हलविण्यात आले. दरम्यान, चार बिबटे एकत्रित फिरताना आढळल्याने उर्वरित तीन बिबटे परिसरात असण्याची शक्यता वन विभागाने व्यक्त केली आहे. त्यामुळे त्याच ठिकाणी पुन्हा पिंजरा लावण्यात आला असून भक्ष्य म्हणून कोंबड्या ठेवण्यात आल्या आहेत. वन विभागाने नागरिकांना विशेषतः सायंकाळी व रात्रीच्या वेळी अधिक दक्षता बाळगण्याचे आवाहन केले आहे.