माळेगाव, ता. १९ : माळेगाव बुद्रुक (ता. बारामती) नगरपंचायत पंचवार्षिक निवडणुकीच्या रविवारी (ता. २१) होणाऱ्‍या मतमोजणी प्रक्रिया पारदर्शकपणे होण्यासाठी प्रशासनाने तयारी केली आहे.
माळेगाव नगरपंचायतीच्या निवडणुकीच्या पार्श्वभूमीवर येथील क्रीडा संकुलामध्ये मतमोजणीची तयारी अंतिम टप्प्यात आली आहे. निवडणूक प्रक्रियेतील अत्यंत महत्त्वाचा टप्पा असलेल्या मतमोजणीसाठी प्रशासनाने कडेकोट बंदोबस्तासह सर्व यंत्रणा सज्ज ठेवली आहे. पारदर्शक व शांततेत निकाल जाहीर होण्यासाठी काटेकोर नियोजन करण्यात आले आहे, अशी माहिती निवडणूक निर्णय अधिकारी उज्ज्वला सोरटे यांनी दिली. मतमोजणी केंद्रात आवश्यक त्या भौतिक सुविधा, सीसीटीव्ही कॅमेरे, स्वतंत्र प्रवेश-निर्गम मार्ग, उमेदवार व त्यांच्या प्रतिनिधींसाठी ओळखपत्र व्यवस्था करण्यात आली आहे. १७ प्रभागनिहाय स्वतंत्र टेबलवर मतमोजणी होणार असून, निवडणूक आयोगाच्या मार्गदर्शक सूचनांनुसार प्रक्रिया पार पडणार आहे, असे त्यांनी सांगितले. दरम्यान, सहाय्यक पोलिस निरीक्षक सचिन लोखंडे यांनी सुरक्षेच्या दृष्टीने मतमोजणी केंद्र परिसरात आजपासूनच पोलीस बंदोबस्त तैनात केल्याचे दिसून आले. कोणताही अनुचित प्रकार घडू नये, यासाठी वरिष्ठ अधिकारी स्वतः लक्ष ठेवून आहेत. निकालाच्या दिवशी अफवा पसरविणे, कायदा-सुव्यवस्थेला धोका निर्माण करणाऱ्या कृत्यांवर कठोर कारवाई केली जाणार असल्याचा इशारा अधिकारी लोखंडे यांनी दिला.