माले, ता. १८ : माले (ता. मुळशी) येथील औद्योगिक प्रशिक्षण संस्थेतील १६ प्रशिक्षणार्थींना ‘बजाज ॲटो’मध्ये नोकरीची संधी मिळाली आहे. दारवली (ता. मुळशी) येथे सिंबायोसिस सेंटर फॉर ट्रेनिंग इन ॲडवान्स मॅन्युफॅक्चरिंग टेक्नॉलॉजीस येथे जिल्हा कौशल्य विकास व रोजगार केंद्राच्या वतीने रोजगार मेळावा आयोजित केला होता. यामध्ये १५ कंपन्यांनी सहभाग घेतला होता. माले येथील औद्योगिक प्रशिक्षण संस्थेतील इलेक्ट्रॉनिक, मेकॅनिकल व इलेक्ट्रिशियन ट्रेडमधील १६ प्रशिक्षणार्थींची या मेळाव्यातून ‘बजाज ॲटो लिमिटेड’ कंपनीसाठी निवड झाली. या प्रशिक्षणार्थींना कंपनीकडून नेमणूक पत्रही देण्यात आले. निवड झालेल्या प्रशिक्षणार्थींना प्राचार्य बाम्हणे व निदेशक वैभव मालुसरे यांनी मार्गदर्शन केले होते. मुळशी धरण विभाग शिक्षण मंडळाचे अध्यक्ष व माजी आमदार शरद ढमाले, कार्याध्यक्ष शरद शेंडे, सचिव रमेश जोरी यांनी या विद्यार्थ्यांचे अभिनंदन केले.