मोरगाव, ता. २५ : मोरगाव (ता. बारामती) येथील पोलिस मदत केंद्रात नियमित किमान एक कर्मचारी २४ तास कार्यरत असणे आवश्यक असून, येथे विविध समस्या नियंत्रित ठेवण्यासाठी एक कर्मचारी कायमस्वरूपी सेवेत ठेवावा, अशी नागरिकांची मागणी आहे.
वास्तविक, मोरगाव पोलिस मदत केंद्र यापूर्वी वडगाव निंबाळकर पोलिस ठाण्याच्या कार्यक्षेत्रामध्ये होते. मात्र, दोन वर्षांपूर्वी स्वतंत्र सुपा पोलिस ठाणे सुरू झाल्यानंतर भौगोलिक रचनेनुसार व अंतराच्या निकषांवरून मोरगाव पोलिस मदत केंद्राचा समावेश करण्यात आला. सुपा पोलिस ठाण्याची इमारत प्रशस्त करण्यात आली आहे. मात्र, या ठिकाणी असणारी गावांची संख्या व विस्तारित भौगोलिक क्षेत्र या तुलनेतून कर्मचाऱ्यांची संख्या जेमतेम आहे. अपुऱ्या कर्मचारी संख्येमुळे अनेक वेळा मोरगाव पोलिस मदत केंद्राचे कर्मचाऱ्यांना सुपा पोलिस ठाण्याच्या मुख्यालयातील कामकाज दिले जाते, यावेळी येथे कोणीच उपलब्ध नसते.
अनेक वेळा अपघात यासह वाद- विवाद, सामाजिक शांतता भंग होईल, असे विविध प्रकार व अवैध व्यवसाय यावर वेळीच कारवाई व उपाययोजना करण्यासाठी मोरगाव पोलिस मदत केंद्रात गरज असूनही कर्मचारी उपलब्ध नसल्याची परिस्थिती निर्माण होते.