मोरगाव, ता. २५ : ग्रामीण तीर्थक्षेत्र विकास योजनेअंतर्गत तीर्थक्षेत्र मोरगाव (ता. बारामती) येथील भाविकांच्या सुविधेसाठी वाहनतळ बांधणे व पोहच रस्ते यासाठी एक कोटी ९० लाख रुपये, तर स्मशानभूमीसाठी ८० लाख रुपयांचा निधी उपलब्ध झाला आहे. त्यामुळे आता भाविकांना येथे सुसज्ज वाहनतळाची सुविधा मिळणार आहे.
बारामती पंचायत समितीच्या बांधकाम विभागाच्या नियंत्रणाखाली ही विकासकामे सुरू आहेत. मोरगावला पर्यटन विकास महामंडळ यांच्याकडून ब वर्गाचा दर्जा मिळाला असून, ग्रामीण भागातील यात्रा स्थळांच्या विकासासाठी विशेष कार्यक्रम तीर्थक्षेत्र विकास योजनेअंतर्गत वाहनतळ विकासासाठी निधी उपलब्ध झाला आहे. तीर्थक्षेत्र विकास आराखड्यातून वाहनतळ काँक्रिटीकरण व पोहच रस्ते यासाठी एक कोटी ९० लाखांचा निधी उपलब्ध आहे. एक कोटी १९ लाख ९९ हजार निधीतून वाहन तळ्याचे काम केले जाणार आहे, तर ६९ लाख ९९ हजार रुपयांच्या निधीतून पोहच रस्ते व या ठिकाणी सुलभ प्रसाधनगृहाचे काम केले जाणार आहे, अशी माहिती बारामती पंचायत समितीच्या बांधकाम विभागाची शाखा अभियंता सुहास लडकत यांनी दिली.
ग्रामपंचायतीने ठिकठिकाणी जागा अधिग्रहण करून वाहनतळ व्यवस्था केली आहे. मात्र, दिवसेंदिवस भाविकांची वाढत चाललेली संख्या पाहिली तर उपलब्ध वाहनतळ अपुरे पडत आहे. त्यामुळे केलेल्या कामाचा भरीव फायदा भाविकांना होणार आहे. त्यामुळे नवीन सोयीसुविधायुक्त वाहनतळामुळे भाविकांच्या वाहनांच्या सुरक्षिततेचा प्रश्न मिटणार आहे.

स्मशानभूमीसाठी ८० लाखांचा निधी
जिल्हा नियोजन समितीकडून उपलब्ध झालेल्या ८० लाख रुपयांच्या निधीमधून स्मशानभूमीचे काम सुरू करण्यात आले आहे. जिल्हा वार्षिक नियोजन २०२३- २४ या वर्षात जन सुविधांसाठी विशेष अनुदान या उपक्रमांमधून निधी मंजूर केला आहे. या निधीमधून या ठिकाणी स्मशानभूमी बांधकामासाठी २० लाख, स्मशानभूमी सुधारणा यासाठी २० लाख, वेटिंग शेडसाठी २०, तर दशक्रिया घाट यासाठी २० लाख असा निधी उपलब्ध झाला आहे.