महाळुंगे पडवळ, ता. २७ : साकोरे (ता.आंबेगाव) येथे ढगफुटी सदृश पाऊस झाल्याने विहिरीलगतची जमीन व भिंत खचून मातीचा राडारोडा विहिरीत कोसळला. यामुळे सामूहिक विहीर गाडली गेली आहे. त्यामुळे शेतकऱ्याचे दीड लाख रुपयांचे नुकसान झाले आहे. जवळपास २५ ते ३० फूट विहीर गाडून गेली आहे.
साकोरे ते वडगाव काशिंबेग रस्त्यालगत सुरेश महिपती मोढवे, उल्हास महिपती मोढवे, चंद्रकांत महिपती मोढवे व सुनील महिपती मोढवे यांच्या सामूहिक मालकीची विहीर आहे. मोढवे कुटुंबीयांनी गट क्रमांक २६१ मध्ये सन १९८५ मध्ये ६० फूट खोल विहीर तयार केली होती. त्यावर दगडी बांधकाम केले होते. घोडनदीपासून उत्तर बाजूला ८०० ते एक हजार फूट विहीर लांब आहे. ७० हजार रुपये किमतीच्या साडे सात अश्वशक्ती क्षमतेच्या दोन विद्युत मोटारी विहिरीवर बसविण्यात आल्या होत्या.
विहिरीवरून शेतीला व घरी पिण्यासाठी पाणी पुरवठा केला जात होता. गेल्या आठ ते दहा दिवसापासून कोसळत असलेल्या पावसाने विहिरीसभोवतालची जमीन भुसभुशीत झाली. जमिनीला चीर पडून दगडात बांधलेली विहीर ढासळली आहे.
दरम्यान, गावकामगार तलाठी नितीन चंद्रकांत माने व पंकज सातकर यांनी घटनास्थळी भेट देऊन रीतसर पंचनामा केला आहे. यावेळी सरपंच अशोकराव मोढवे, कोंडीभाऊ गाडे, भरत चिखले, अनिल गाडे यांच्यासह ग्रामस्थ उपस्थित होते.

02521