महाळुंगे पडवळ, ता. १८ : फुलेवाडी- महाळुंगे पडवळ (ता. आंबेगाव) येथील अतुल स्टोन क्रशर व्यवसाय बंद करण्याबाबतचा ठराव बुधवारी (ता. १७) झालेल्या विशेष ग्रामसभेत मंजूर करण्यात आला.
महाळुंगे पडवळ-फुलेवाडी येथील स्टोन क्रेशर व्यवसायामुळे परिसरातील ग्रामस्थांच्या घरांना तडे गेले असून, शेतीचेही नुकसान होत आहे. त्रस्त झालेल्या किरण रामचंद्र डोके, ज्ञानेश्वर नथू बनकर, प्रविण रमेश डोके, रमेश सदाशिव बनकर, श्रीकांत सोपान घोडेकर, अनंथा नथू बनकर, चंद्रकांत खंडू बनकर, ययाती दत्तात्रेय केदारी, मोहन नामदेव डोके, पोपटी कोंडाजी डोके, ईश्वर रामचंद्र डोके आदीं ग्रामस्थांनी थेट ग्रामपंचायतीसमोर उपोषण सुरु केले होते. त्यानुसार विशेष ग्रामसभा बोलविण्यात आली होती. सरपंच सुजाता सचिन चासकर यांच्या अध्यक्षतेखाली आणि ग्रामविकास अधिकारी शरद बाळसराफ यांच्या उपस्थितीत ग्रामसभा घेण्यात आली. त्याला महिला आणि ग्रामस्थांनी मोठ्या प्रमाणात उपस्थिती लावली. संजय ज्ञानेश्वर घोडेकर यांनी अतुल स्टोन क्रशर व्यवसाय बंद करण्याबाबतचा ठराव मांडला. त्याला उपस्थित नागरिकांनी पाठिंबा दिला.
ग्रामसभेला उपसरपंच अलका पडवळ, माजी सरपंच अशोक डोके, सेवानिवृत्त अधिकारी नवनाथ जंबुकर, शरद सहकारी बँकेचे संचालक के. के. सैद, माजी उपसरपंच विकास पडवळ, हुतात्मा बाबू गेनु प्रतिष्ठानचे अध्यक्ष बाबाजी चासकर, ग्रामपंचायत सदस्य उज्ज्वला आंबटकर, चंद्रकांत बंडू डोके आदी ग्रामस्थांनी चर्चेत भाग घेतला. सरपंच व उपसरपंच याच्या चालू कार्यकाळात अतुल स्टोन क्रशरला परवानगी देण्यात आली नसल्याची माहिती सरपंच सुजाता चासकर यांनी दिली. ग्रामपंचायतीमार्फत ठरावाची प्रत पालकमंत्री, महसूलमंत्री, प्रांत अधिकारी, तहसीलदार, गटविकास अधिकारी कार्यालयाला पाठविण्यात येणार असल्याचे ग्रामपंचायत कार्यालयातून सांगण्यात आले.
MPW25B03515