महुडे, ता. २५ : निगुडघर (ता. भोर) येथे अपघाताचे प्रमाण वाढल्याने गतिरोधक बसवण्याची मागणी निगुडघर देवघरच्या सरपंच मंगल कंक यांनी केली आहे.

हिरडस मावळातील मध्यवर्ती ठिकाण असलेल्या निगुडघर येथे भोर महाड रस्त्याशेजारी रविवारचा आठवडे बाजार भरतो. तसेच इतर दिवशीही नीरा देवघर धरण रिंग रोड वरील गावातील, हिर्डोशी, म्हसर भागातील नागरिकांची बाजार व इतर कामासाठी वर्दळ असते. त्याचबरोबर शाळकरी मुलांचीही वर्दळ असते.

आपटी ते निगुडघर रस्त्याचे डांबरीकरण पावसापूर्वी झाल्यामुळे रस्ता चांगला झाल्याने देवघरकडून भोरकडे जाताना उताराचा रस्ता असल्याने वाहनांचा वेग जास्त असतो. त्यामुळे निगुडघर येथे नेहमी लहान मोठे अपघात होत असतात.

अपघात टाळण्यासाठी या निगुडघर येथील चौकात दोन व प्राथमिक शाळेजवळ एक असे तीन गतिरोधक बसवून सुचनादर्शक फलक बसवावेत अशी मागणी ग्रामपंचायत मार्फत सार्वजनिक बांधकाम विभागाला निवेदनाद्वारे केली आहे.

निवेदन देताना सार्वजनिक बांधकाम विभागाचे शाखा अभियंता एम. डब्लू. शेख, व्ही. पी.. गुजर, विद्याधर कांबळे तसेच अनिल बांदल, मारुती कंक आदी उपस्थित होते.