महुडे, ता. ४ : महाड-पंढरपूर रस्त्याचे धोकादायक परिस्थितीत सुरू असलेले काम तत्काळ बंद करण्याची मागणी हिर्डोशी खोऱ्यातील शेतकऱ्यांनी केली आहे. याबाबत मंगळवारी (ता. ४) भोरच्या उपविभागीय अधिकाऱ्यांना निवेदन देण्यात आले.
महाड-पंढरपूर राष्ट्रीय मार्गाच्या रुंदीकरणाचे काम भोर तालुक्यात सुरू आहे. या मार्गावरील हिर्डोशी, कोंढरी, वारवंड, शिरगाव, वेणुपुरी, देवघर, अशिंपी या गावांच्या ह‌द्दीत धोकादायक पद्धतीने व सुरक्षेचे सर्व नियम पायदळी तुडवून बेकायदेशीरपणे काम सुरू आहे. कोणत्याही प्रकारचे सूचना व दिशादर्शक फलक लावले नसून, कामासाठी येणारे डंपर व इतर वाहने नंबरप्लेटविना बेदरकारपणे चालवली जातात. १ मार्चला झालेल्या अपघातात एका व्यक्तीला जीव गमवावा लागला. सात दिवसांत सुरक्षतेच्या दृष्टीने, तसेच रस्ते कामामुळे होणाऱ्या धुळीमुळे शेतजमिनीच्या नुकसानीबाबत रहिवासी, शेतकऱ्यांना विश्‍वासात घेऊन कारवाई न केल्यास रस्त्याचे काम बंद पाडले जाईल. हे काम करताना पाणीपुरवठ्याची पाइपलाइन, सांडपाणी वाहिन्या व शेती पाइपलाइनचे मोठ्या प्रमाणात नुकसान केले असून, त्यांची तत्काळ दुरुस्ती करून पूर्ववत कराव्यात. याबाबत संबंधित अधिकारी व ठेकेदारांसोबत बैठकीचे आयोजन करावे, असे निवेदनात म्हटले आहे.
निवेदनावर बबन मालुसरे, किसन कंक, धोंडिबा मालुसरे, संतोष गोळे, जिजाबा पारठे, विठ्ठल धामुनसे, भगवान ढवळे, रवींद्र मोरे, लक्ष्मण धामुनसे, अरुण मालुसरे, संतोष गोळे यांच्या सह्या आहेत.