हिर्डोशी, ता. १८ : महिला, मुलींना महाराष्ट्रातील गडकिल्ले, इतिहासाचे महत्त्व कळावे, तसेच हल्लीच्या काळात मोबाईल व इतर कामातून वेळ काढून गडकिल्ल्यांवर प्रत्यक्ष जाऊन गडकिल्ले व छत्रपती शिवाजी महाराज यांच्याबरोबर त्या काळातील रणरागिणींचा इतिहास अनुभवण्यासाठी प्रेरणा मिळावी, यासाठी सोम फाउंडेशनच्या महिलांकडून १२ महिन्यात १२ किल्ले करण्याची मोहीम राबविण्यात येत आहे. यातूनच फाउंडेशनच्या महिलांनी भरपावसात रविवारी (ता. १५) किल्ले रायरेश्वर (ता. भोर) येथे भेट देऊन माहिती घेत मोहिमेतील आठव्या गडाची पाहणी केली.
छत्रपती शिवाजी महाराजांबरोबरच राजमाता जिजाऊ, महाराणी सईबाई, महाराणी येसूबाई आणि महाराणी ताराराणी यांचा इतिहास महिलांना कळावा. गडकिल्ल्यांच्या माध्यमातून महिलांचे व्यायामातून आरोग्य सुधारावे, इतिहासातून ज्ञानात भर पडावी, महिलांनी सक्षम बनावे, महिला सबलीकरण हा या मोहिमेचा उद्देश आहे. मोहिमेची सुरुवात किल्ले सिंहगड येथून केली असून सिंहगड, प्रतापगड, मल्हारगड, पुरंदर, विसापूर, लोहगड, हरिश्चंद्र आणि रायरेश्वर हे आठ किल्ले पूर्ण केले असल्याचे फाउंडेशनच्या अध्यक्षा कीर्ती कोकाटे यांनी सांगितले.
कोकाटे, जस्मिन खडतरे, वर्षा दोबाळे, मोना शिंदे, वर्षा मोरे, गौरी देशपांडे, विद्या मोरे, स्नेहल जिनगारे, विजया शिंदे व उपाध्यक्ष युवराज लाहोटी हे या मोहिमेचे नियोजक‌ आहेत.