हिर्डोशी, ता. ५ : भोर शहरातील वाघजाईनगर परिसरात होत असलेला विद्युत पुरवठा अत्यंत कमी दाबाने होत असल्याने विविध अडचणींचा सामना स्थानिक नागरिकांना करावा लागत आहे. त्यामुळे जास्त क्षमतेचे अथवा वाढीव रोहित्र बसविण्याची मागणी भोर महावितरणाचे कार्यकारी अभियंता अविनाश वाघमारे यांच्याकडे आम्ही भोरकर प्रतिष्ठानने सोमवारी (ता. ४) निवेदनाद्वारे केली आहे.
वाघजाईनगर भागात कमी दाबाच्या वीजपुरवठ्यामुळे घरगुती, कृषी व लघुउद्योगातील विद्युत उपकरणे व्यवस्थित चालत नाहीत. त्यामुळे नागरिकांना अनेक समस्यांना सामोरे जावे लागत आहे. या भागात लोकसंख्या आणि वीज वापर सतत वाढत आहे. सध्या असलेले रोहित्र २०० के.व्ही क्षमतेचे असून, ते अपुरे पडत आहे. यामुळे वारंवार फ्यूज उडून वीजपुरवठा खंडित होत आहे. तसेच, कमी दाबाच्या विद्युत प्रवाहामुळे दैनंदिन कामकाजातील उपकरणे नीट चालत नसून, बिघाड होत आहे. यामुळे सततच्या समस्या उद्भवत आहेत. त्यामुळे नियमित वीज पुरवठा सुरळीत राहण्यासाठी येथे अधिक क्षमतेचे नवीन रोहित्र बसवण्याची मागणी निवेदनाद्वारे केली आहे. यावेळी प्रतिष्ठानचे अध्यक्ष समीर घोडेकर व कार्यकर्ते उपस्थित होते.