हिर्डोशी, ता. १९ : उन्हाळी भुईमूग पिकाच्या अनुदानित बियाण्यांसाठी तालुक्यातील शेतकऱ्यांनी अर्ज सादर करावेत, असे आवाहन भोर तालुका कृषी विभागाकडून करण्यात आले आहे. राष्ट्रीय खाद्यतेल अभियान (तेलबिया) २०२५ अंतर्गत हे १०० टक्के अनुदान प्रमाणित बियाण्यांचे वितरण होणार आहे. या अभियानांतर्गत, उत्पादकता वाढविण्यासाठी व सुधारित वाणांच्या प्रसारासाठी उन्हाळी हंगामाच्या भुईमूग पिकासाठी प्रति हेक्टर १५० किलो (दर ११४ रुपये प्रतिकिलो) बियाणे हे केंद्र शासनाने निवडलेल्या जिल्ह्यांना १०० टक्के अनुदानावर वितरित करण्यात येणार आहेत. प्रति लाभार्थी किमान ०.२० हेक्टर आणि कमाल १ हेक्टरपर्यंत या योजनेचा लाभ दिला जाणार आहे. यासाठी शेतकऱ्यांची ‘ॲग्रीस्टॅक’ ॲपवर नोंदणी बंधनकारक आहे. योजनेबाबत अधिक माहितीसाठी तालुका कृषी अधिकारी कार्यालय व संबधित सहायक कृषी अधिकारी यांच्याशी संपर्क साधावा, असे आवाहन भोर तालुका कृषी अधिकारी शरद धर्माधिकारी यांनी केले आहे.