हिर्डोशी, ता. २८ : उपमुख्यमंत्री अजित पवार यांच्या अपघाताच्या निधनाची बातमी समजताच भोरच्या ग्रामीण भागातून हळहळ व्यक्त करण्यात येत आहे. सोशल मीडियातून राष्ट्रवादी कार्यकर्त्यांबरोबरच सर्वपक्षाचे कार्यकर्ते व सर्वसामान्य नागरिकांनी श्रद्धांजली अर्पण करत दुःख व्यक्त केले.
जिल्हा परिषद व पंचायत समिती निवडणूकीचा भोर तालुक्यातील प्रचार सर्वच पक्षातील उमेदवारांकडून बंद ठेवण्यात आला, तर भोर शहरात बंद पाळण्यात आला. निवडणूकीच्या माध्यमातून राष्ट्रवादी काँग्रेस पक्षाचा बुधवारी (ता. २८) होणारा मुंबई, वाशी येथील स्नेहमेळावा रद्द करण्यात आला आहे. पवार यांच्या जिल्हा परिषद व पंचायत समिती निवडणूकीसाठी १ फेब्रुवारी रोजी भोर शहरात एक व हायवेला एक अशा दोन सभा होणार होत्या. या सभेतून दादा काय बोलणार? याकडे संपूर्ण तालुक्याचे लक्ष लागून राहिले असतानाच पवार यांच्या अपघाती निधनाने त्यांचे विचार ऐकण्याची संधी आता भोरकरांना कधीच मिळणार नाही.