हिर्डोशी, ता. २१ : किल्ले रायरेश्वर (ता. भोर) येथील पठारावरील मंदिर आणि परिसरात तिथीनुसार ३८१ वा हिंदवी स्वराज्य शपथ दिन विविध उपक्रमातून बुधवारी (ता. २५) साजरा करण्यात आला.
शंभू महादेव शिवलिंग जलाभिषेक, दुग्धाभिषेक, गड आणि ध्वज पूजनाने कार्यक्रमाची सुरुवात झाली. शिवपालखी मिरवणूक व फलटणच्या संस्कृती प्रतिष्ठान ढोल-ताशा व ध्वज पथक वाद्यांनी पठार दणाणून गेले.‌ शुभम दिघे, वरद कोळपकर, उर्वशी वैजवाडे आरेखित जननी माता मंदिर व हिंदवी स्वराज्य स्तंभ आरेखन चित्रांचे तसेच डॉ. सचिन पुणेकर लिखित हिंदवी स्वराज्य शपथभूमी रायरेश्वर माहिती पुस्तिकेचे प्रकाशन करण्यात आले. चंद्रकांत शहासने संग्रहित २००० क्रांतिकारकांच्या छायाचित्रांचे प्रदर्शन मांडण्यात आले. महाराष्ट्र शासनाच्या सांस्कृतिक कार्य संचालनालयातर्फे शिववंदना देण्यात आली. शिवकार्यात योगदान देणाऱ्या संस्थांचा, सरदार घराण्यांतील वंशजांचा सन्मान ग्रामस्थांकडून करण्यात आला.
रायरेश्वर भूमीचा समग्र शाश्वत विकास, केंद्र व राज्य सरकारच्या स्वदेश दर्शन योजनेत व स्वराज्य सर्किटमध्ये रायरेश्वरचा समावेश, हिंदवी स्वराज्य स्तंभाच्या उभारणीबाबतची आवश्यकता अधोरेखित केली. तसेच हा कुंभमेळा शासकीय, लोकसहभागातून मोठ्या प्रमाणात साजरा करण्याचा निर्धार करण्यात आला.

यावेळी डॉ. नीलकंठ शिवाचार्य महाराज, डॉ. मोहन वामन, डॉ. सचिन पुणेकर, युवराज जेधे, मारुती गोळे, दत्तात्रेय जंगम, मौनीबाबा महाराज, ग्रामस्थ व वन विभागाचे योगदान लाभले.
श्री रायरेश्वर ग्रामस्थ संस्था, बायोस्फिअर्स संस्था, ग्रामपंचायत रायरी, स्वराज्याभूमी प्रतिष्ठान, रायरेश्वर स्मारक समिती व सेवाभावी संस्था यांच्या माध्यमातून उपक्रमांचे आयोजन केले. प्रस्तावना डॉ. सचिन पुणेकर, सूत्रसंचालन लक्ष्मण शिंदे यांनी केले.