नारायणगाव, ता. १८ : येथील पुणे-नाशिक महामार्गावर भरधाव जाणाऱ्या वाहनाची धडक बसून कोल्हा या वन्य प्राण्याचा मृत्यू झाला. ही घटना शुक्रवारी (ता. १८) सकाळी दहा वाजण्याचा सुमारास शॅम्पेन कंपनी जवळ घडली.
मागील चार दिवसांत भरधाव वेगाने जाणाऱ्या वाहनाची धडक बसून दोन कोल्हे मृत झाले आहेत. दोन्ही घटना दिवसा झाल्या आहेत. वाहनांचा वेग नियंत्रित असता तर या दोन वन्य प्राण्यांचा बळी गेला नसता, अशी माहिती वनपाल अनिता होले यांनी दिली.
चौदा जानेवारी रोजीसुद्धा याच भागात भरधाव जाणाऱ्या वाहनाची धडक बसून कोल्हा मृत्युमुखी पडला होता. मागील वर्षभरामध्ये या भागात महामार्गावर झालेल्या अपघातात वाहनांची धडक बसून कोल्हा, तरस व पाच बिबट्यांचा मृत्यू झाला आहे. महामार्गावर वाहनाची धडक बसून वन्य प्राण्यांच्या मृत्यूच्या घटना वाढल्या आहेत. मात्र, वन्य प्राण्यांचा जीव वाचवण्यासाठी राष्ट्रीय महामार्ग व वन विभागाकडून कोणत्याही उपाययोजना केल्या जात नाहीत. याबाबत वन्यप्रेमी चंद्रशेखर भागवत, हनुमंतराव भापकर यांनी खंत व्यक्त केली आहे.