नारायणगाव, ता. १७ : येथील पुणे- नाशिक महामार्गावरील बाह्यवळण रस्त्यावरील पुलाखाली गांजा विक्री करण्यासाठी आलेल्या आकाश मारुती शिंदे (वय २५, रा. हिवरेतर्फे नारायणगाव, ता. जुन्नर, सध्या रा. नारायणगाव) या तरुणाला सापळा रचून नारायणगाव पोलिसांनी अटक केली. त्याच्याकडून ४.८ किलो वजनाचा गांजा, वजनकाटा, काळ्या रंगाची स्कॉडा कंपनीची मोटार, असा ५ लाख ४९ हजार रुपये किमतीचा मुद्देमाल जप्त केला आहे. त्याला जुन्नर न्यायालयाने पाच दिवसांची पोलिस कोठडी दिली आहे, अशी माहिती नारायणगाव पोलिस ठाण्याचे सहाय्यक पोलिस निरीक्षक महादेव शेलार यांनी दिली.
पुणे जिल्ह्यात अवैधरीत्या चालू असलेल्या अमली पदार्थ विरोधी मोहीम सुरू केली आहे. त्या अंतर्गत कारवाई सुरू असताना एक व्यक्ती नारायणगाव येथे पुणे- नाशिक महामार्गावरील बाह्यवळण रस्त्यावरील पुलाखाली गांजा विक्री करण्यासाठी येणार असल्याची माहिती मिळाली होती. त्यानुसार सहाय्यक पोलिस निरीक्षक महादेव शेलार यांच्या मार्गदर्शनाखाली पोलिस उपनिरीक्षक विनायक दडस पाटील, पोलिस उपनिरीक्षक जगदेव पाटील, पोलिस शिपाई सत्यम केळकर, पोलिस शिपाई सुभाष थोरात, पोलिस शिपाई गोरक्ष केंद्रे, पोलिस पाटील जाधव, महिला पोलिस शिपाई शीतल गारगोटे, पोलिस हवलदार संतोष कोकणे या पथकाने सापळा लावून १६ मे रोजी दुपारी मुद्देमालासह आरोपीला अटक केली.