नारायणगाव, ता. ३१ : नारायणगाव (ता. जुन्नर) येथील लाला अर्बन सहकारी बँकेस सन २०२३-२०२४ या आर्थिक वर्षामध्ये उल्लेखनीय कामकाज केल्याबद्दल महाराष्ट्र राज्य सहकारी बँक्स असोसिएशनने ‘पद्मभूषण वसंतदादा पाटील उत्कृष्ट नागरी सहकारी बँक’ पुरस्कार जाहीर केला आहे. उत्कृष्ट नागरी सहकारी बँकेच्या स्पर्धेत पुणे विभागामधून ५०० कोटीपर्यंतच्या ठेवी असलेल्या बँकांतून लाला बँकेची निवड केली आहे, अशी माहिती बँकेचे अध्यक्ष युवराज बाणखेले यांनी दिली.
लाला बँकेच्या संचालकांची बैठक अध्यक्ष युवराज बाणखेले यांच्या उपस्थितीत बँकेच्या नारायणगाव येथील मुख्य कार्यालयात झाली. यावेळी उपाध्यक्ष जितेंद्र गुंजाळ, व्यवस्थापकीय मंडळाचे अध्यक्ष सी. ए. जैनुद्दीन मुल्ला, ज्येष्ठ संचालक ॲड. निवृत्ती काळे, रामदास बाणखेले, अशोक गांधी, नितीन लोणारी, मंगेश बाणखेले, नारायण गाढवे, जयसिंग थोरात, संदीप लेंडे, डॉ. सचिन कांबळे, सुनीता साकोरे, इंदुमती कवडे, बाळासाहेब शिंदे, भानुदास टेंगले, तज्ञ संचालक किरण कर्नाड, ॲड. शंकर शेवाळे, मुख्य कार्यकारी अधिकारी डी. एन. सुरम, उपमुख्य कार्यकारी अधिकारी प्रदीप मोरे, कर्ज अधिकारी प्रमोद कांबळे, वसुली अधिकारी संतोष पटाडे, गुंतवणुक अधिकारी मनोहर गभाले आदि उपस्थित होते.
अध्यक्ष बाणखेले म्हणाले, ‘‘दिवंगत माजी खासदार किसनराव बाणखेले यांनी स्थापन केलेल्या लाला बँकेने सन २०२३-२०२४ या आर्थिक वर्षात ठेवींमध्ये ४५ कोटी रुपयांची, तर कर्ज वाटपात ४६ कोटी रुपयांची वाढ केली आहे. बँकेचा सीआरएआर १४.०६ टक्के असून, नेट एनपीएचे प्रमाण ० टक्के आहे. बँकेला ऑडिट वर्ग ‘अ’ मिळाला आहे. या आर्थिक निकषावर हा पुरस्कार लाला बँकेस जाहीर झाला आहे.’’