नारायणगाव, ता. ७ : अपुऱ्या जागेमुळे शेतकऱ्यांची होणारी गैरसोय विचारात घेऊन जुन्नर कृषी उत्पन्न बाजार समितीच्या नारायणगाव उपबाजारातील धना, मेथी बाजार नवीन जागेत स्थलांतरित करण्यात येईल. सध्याच्या टोमॅटो उपबाजार आवाराचे आधुनिकीकरण करण्यात येईल. नारायणगाव उपबाजार आवारात शेतकऱ्यांसाठी शेतकरी निवास बांधण्यात येईल. याबाबतचा ठराव संचालक मंडळाने मंजूर केला आहे, अशी माहिती सभापती संजय काळे यांनी दिली.
नारायणगाव टोमॅटो उपबाजारातील शिवछत्रपती व्यापारी गणेश मंडळाने आषाढी एकादशीनिमित्त महापूजा, शेतमाल विक्रीसाठी घेऊन आलेल्या शेतकऱ्यांना खिचडी वाटप कार्यक्रमाचे आयोजन केले होते. यावेळी सभापती काळे यांच्या हस्ते विठ्ठल रुक्माई प्रतिमेचे पूजन करण्यात आले. सभापती काळे व उपस्थित संचालक यांच्या हस्ते पाचशे शेतकऱ्यांना खिचडी वाटप करण्यात आली.
यावेळी ज्येष्ठ संचालक धनेश संचेती, निवृत्ती काळे, माऊली खंडागळे, सारंग घोलप, तुषार थोरात, नाना घोडे, पांडुरंग गाडगे, जनार्दन मरभळ, आरती वारुळे, व्यापारी डी.बी. नेहरकर, गणेश फुलसुंदर, अशोक दांगट, पप्पू थोरात, सतीश भोर,योगेश घोलप, जालिंदर डुकरे, संदीप जाधव, अमित दांगट, बाजार समितीचे सचिव रुपेश कवडे, उपसचिव शरद घोंगडे आदी मान्यवर उपस्थित होते.

सभापती संजय काळे म्हणाले की, नारायणगाव येथील टोमॅटो उपबाजाराने राज्यात नावलौकिक मिळवलेला आहे. यामध्ये शेतकरी व व्यापारी यांचे मोठे योगदान आहे. श्रीगोंदा, बीड,पारनेर, शिरूर, अकोला, अहिल्यानगर, बारामती भागातील शेतकरी नारायणगाव उप बाजारात टोमॅटो विक्रीसाठी घेऊन येत आहेत. टोमॅटोची आवक वाढल्याने जागे अभावी शेतकऱ्यांची गैरसोय होत आहे. यामुळे उपबाजार आवारातील धना मेथी बाजार अन्य ठिकाणी स्थलांतरित करण्याचा निर्णय संचालक मंडळाने घेतला आहे. शेतकरी व व्यापारी यांच्यासाठी उपबाजार आवारात अल्प दरात भोजन थाळी सुरू केली आहे.
उपसचिव शरद घोंगडे यांनी सूत्रसंचालन केले.