नारायणगाव, ता. ९: बैलगाडा शर्यतीत अनेक बक्षीस मिळवलेल्या, घाटात हरणाप्रमाणे धावणाऱ्या, घाटाचा राजा म्हणून नावलौकिक मिळवलेल्या रामा बैलाच्या मालकी हक्कावरून दोन जिवलग मित्रांमध्ये निर्माण झालेला वाद बैलगाडा शौकीन व मालकांमध्ये चर्चेचा विषय झाला आहे.
गुंजाळवाडी (ता. जुन्नर) येथे रामा बैलाच्या मालकी हक्कावरून दोन गटात कोयता, दगड व लाकूड आदी साहित्याचा वापर करून हाणामारीची घटना घडली. याप्रकरणी परस्पर दिलेल्या फिर्यादीवरून सहा जणांवर नारायणगाव पोलिसांनी गुन्हा दाखल केला आहे. गुंजाळवाडीतील बैलगाडा शौकीन असलेले नितीन शिंदे व राहुल ढवळे हे दोघे जिवलग मित्र आहेत. त्यांचा शर्यतीचे बैल खरेदी- विक्रीचा व्यवसाय आहे. तीन वर्षांपूर्वी बैलगाडा मालक युवराज शिंदे व राहुल ढवळे यांनी औरंगाबाद येथून एक लाख रुपये किमतीला दोन वर्षे वयाचा बैल खरेदी केला. त्यानंतर युवराज यांना दोन लाख पन्नास हजार रुपये देऊन बैल राहुल व नितीन यांनी भागीदारीत खरेदी केला. बैल खरेदी करताना राहुल याने दोन लाख रुपये तर नितीन याने पन्नास हजार रुपये असे अडीच लाख रुपये युवराज शिंदे यांना रोखीने दिले. देखभाल करण्यासाठी हा बैल नितीन शिंदे यांच्या ताब्यात ठेवण्यात आला. त्यांचे वडील भगवान शिंदे यांनी या बैलाला तूप, अंडी, कडधान्य, प्रोटीन पावडर असा खुराक देऊन शर्यतीसाठी तयार केले. त्यासाठी त्यांनी प्रतिमहिना सुमारे वीस हजार रुपये खर्च केला. या बैलाने जिल्ह्यातील अनेक घाटात बक्षीसे मिळविली. त्यांनी या बैलाला ‘रामा’ असे नाव ठेवले. बैलगाडा शौकीन व मालकांमध्ये रामा बैलाची ख्याती सर्व दूर पसरली. सद्यःस्थितीत बैलगाडा मालकांकडून रामा बैलाला वीस लाख रुपयांची मागणी होत आहे. बैलगाडा शौकीन आशिष फुलसुंदर यांनी सात लाख रुपयांना बैल खरेदी करण्याची तयारी दाखवली होती. शर्यतीत रामाचा नावलौकिक वाढल्याने व किंमत वाढल्याने रामाच्या मालकी हक्कावरून नितीन व राहुल या दोन जिवलग मित्रांमध्ये वाद निर्माण झाला. बैल खरेदीसाठी मी पैसे दिले आहेत. यामुळे सध्याची किंमत ठरवून रामा बैल माझ्या ताब्यात मिळावा, अशी मागणी राहुलने केली. मात्र, रामाचे पालन पोषण करून त्याला शर्यतीसाठी मी तयार केले आहे. असा दावा करून नितीनने राहुलला रामाला देण्यास नकार दिला. दरम्यान, आजारी रामाला पाहण्यासाठी राहुल त्याच्या दोन मित्रांसमवेत गुंजाळवाडी येथील नितीन शिंदे यांच्या गोठ्यावर गेला. यावेळी नितीन व राहुल यांच्यात वाद झाला. राहुल व त्याच्या दोन मित्रांनी कोयता व लाकडी दांडक्याने मारहाण केल्याची तक्रार नितीन यांनी नारायणगाव पोलिस ठाण्यात दिली तर नितीन व त्याच्या कुटुंबातील इतर दोन सदस्यांनी लाथा बुक्क्यांनी व दगड डोक्यात टाकून जखमी केल्याची तक्रार राहुल यांनी पोलिस ठाण्यात दिली.
दरम्यान, जखमी राहुल ढवळे खासगी रुग्णालयात उपचार घेत आहे. याबाबत पोलिसांच्या भूमीकडे बैलगाडा मालकांचे लक्ष लागले आहे.

बैलाची विक्री त्रयस्थाला करून आलेली रक्कम राहुल व नितीन यांनी विभागून घ्यावी व वाद मिटवावा. असा सल्ला देण्यात आला आहे. वाद न मिटल्यास रामा बैल ताब्यात घेऊन पांजरपोळ येथे जमा केला जाईल.
- महादेव शेलार, सहाय्यक पोलिस निरीक्षक, नारायणगाव

06837