नारायणगाव, ता. २५ : जुन्नर विधानसभा मतदारसंघातून अपक्ष म्हणून निवडून आलेले आमदार शरद सोनवणे यांनी शिवसेना पक्षात प्रवेश केला आहे. त्यामुळे पक्षांतर बंदी कायद्याचे उल्लंघन झाल्याने त्यांचे विधानसभा सदस्य रद्द करावे, असा अर्ज ॲड.विजय भिका कुऱ्हाडे यांनी विधानसभेचे अध्यक्ष राहुल नार्वेकर यांच्याकडे जून महिन्यात केला होता. त्याची नार्वेकर यांनी दखल घेतली आहे. या संदर्भात पत्र प्राप्त झाल्याच्या दिनांकापासून सात दिवसांच्या आत लेखी खुलासा सादर करावा, अशी नोटीस महाराष्ट्र विधानमंडळ सचिवालयाचे सचिव जितेंद्र भोळे यांनी सोनवणे यांना दिली आहे.
याबाबत ॲड.विजय कुऱ्हाडे म्हणाले की, आमदार सोनवणे यांना जनतेने अपक्ष म्हणून मतदान केले आहे. मात्र, २८ फेब्रुवारी २०२५ रोजी उपमुख्यमंत्री एकनाथ शिंदे यांच्या उपस्थितीत नारायणगाव येथे झालेल्या कार्यक्रमात त्यांनी शिवसेनेत प्रवेश केल्याचे जाहीर केले. यामुळे त्यांनी पक्षांतर बंदी कायद्याचे उल्लंघन केले. शिवसेनेचे पुणे जिल्हा अध्यक्ष म्हणून ते काम पाहत आहेत. त्यांचे विधानसभा सदस्य रद्द करावे, अशी मागणी विधानसभेचे अध्यक्ष यांच्याकडे केली आहे.

मी अपक्षच आहे. शिवसेनेत प्रवेश केला नाही. सरकारला पाठिंबा दिला आहे. यामुळे भाजप, राष्ट्रवादी काँग्रेस, शिवसेना यांचा मी सहयोगी सदस्य आहे. विधानसभा अध्यक्ष यांचे मला नोटीस आली आहे. यामुळे काहीच होणार नाही. मी पाच वर्षे आमदार राहील.
- शरद सोनवणे, आमदार : जुन्नर विधानसभा मतदारसंघ

06929, 06930