नारायणगाव, ता. ३१ : येडगाव (ता. जुन्नर) येथील बंद घराचा दरवाजा उघडून चोरट्यांनी भरदिवसा चोरी करण्याचा प्रयत्न केला. मात्र, लोखंडी कपाटातील लॉकर तोडण्यात अपयश आल्याने कपाटातील सहा तोळे सोन्याचे दागिने व ४० हजार रोख रक्कम सुरक्षित राहिली.
बारसाबाई दत्तात्रेय गावडे या ज्येष्ठ महिलेचे गणेशनगर येथे शेतात घर आहे. गावडे या गुरुवारी (ता. ३१) सकाळी १० वाजण्याच्या सुमारास घराचा दरवाजा बंद करून कामासाठी बाहेर गेल्या होत्या. सायंकाळी सहा वाजता त्यांच्या घरातील सदस्य आले असता चोरट्यांनी कपाट उघडून लॉकर तोडण्याचा प्रयत्न केल्याचे दिसून आले. या बाबतची माहिती पार्थ संपत गावडे यांनी नारायणगाव पोलिसांना दूरध्वनीद्वारे दिली. मात्र, पोलिसांनी दुर्लक्ष करून भुरटे चोर असतील. तक्रार द्यायची असेल तर पोलिस ठाण्याला या, असा उपरोधिक सल्ला दिला.