नारायणगाव, ता. ६ : येथील पुणे- नाशिक महामार्गावरील पूनम हॉटेल चौकात मंगळवारी (ता. ५) सायंकाळी पाच वाजण्याच्या सुमारास पिसाळलेल्या कुत्र्याने तीन मोटरसायकलस्वारांच्या पायाच्या पोटरीजवळ चावा घेतला. त्यामुळे त्यांना गंभीर दुखापत झाली आहे.
येथील कोल्हे मळा रस्ता, नारायणगाव- जुन्नर रस्त्यालगत चिकन व मटण विक्रीची काही टपरी दुकाने कोणतेही परवानगी न घेता सुरू केलेली आहेत. कोंबड्यांची पिसे व अन्य अवयव रस्त्याच्या कडेला किंवा मीना नदी पात्रात टाकलेले दिसतात. त्यामुळे महामार्गालगत परिसरात भटक्या कुत्र्यांचा मोठ्या प्रमाणात वावर आहे. भटके कुत्रे मोटारसायकलस्वारांचा पाठलाग करतात. त्यामुळे या भागात अपघाताच्या घटना घडत आहेत. याच भागातील पूनम हॉटेल चौकात मंगळवारी सायंकाळी पिसाळलेल्या कुत्र्याने पाठलाग करून तीन मोटरसायकलस्वारांच्या पायाचा चावा घेतला. त्यात कुमार बर्डे (वय २४), शुभम खैरे (वय २७, दोघेही रा. नारायणगाव) व अन्य एक (नाव माहीत नाही) हे तिघे जखमी झाले आहेत.
याबाबत ग्रामीण रुग्णालयाच्या वैद्यकीय अधीक्षक डॉ. दीप्ती कळंबकर म्हणाल्या, ‘‘पिसाळलेल्या कुत्र्याचा चाव्यामुळे जखमी झालेले चार रुग्ण नारायणगाव ग्रामीण रुग्णालयात मंगळवारी आले होते. त्यांच्यावर प्राथमिक उपचार करण्यात आले. रुग्णालयात अँन्टीरेबीज लस उपलब्ध नसल्याने पुढील उपचारासाठी त्यांना मंचर येथील उपजिल्हा रुग्णालयात पाठवण्यात आले. अँन्टीरेबीज लस उपलब्ध व्हावी, यासाठी जिल्हा शल्य चिकित्सक यांच्याकडे मागणी पत्र पाठवले आहे.’’

लसच उपलब्ध नाही
नारायणगाव येथील ग्रामीण रुग्णालयात पिसाळलेला कुत्रा चावल्यानंतर देण्यात येणारी इमिनो ग्लोबिन ही अँन्टीरेबीज लस उपलब्ध नाही. ती घेण्यासाठी मंचर येथील उपजिल्हा रुग्णालयात जावे लागले. नारायणगाव ग्रामीण रुग्णालयात अँन्टीरेबीज लस उपलब्ध व्हावी. नारायणगाव ग्रामपंचायतीने भटक्या कुत्र्यांचा बंदोबस्त करावा. अनधिकृत चिकन विक्रीच्या दुकानांवर व मीना नदी पात्रात कोंबड्यांची पिसे टाकणाऱ्यांवर कारवाई करावी, अशी मागणी सजग नागरिकांनी केली आहे.