नारायणगाव, ता. ३० : जुन्नर कृषी उत्पन्न बाजार समितीच्या नारायणगाव येथील उपबाजारात सुरू केलेल्या नाफेड हमीभाव केंद्रात मागील एक महिन्यात ३५८ टन सोयाबीनची खरेदी झाली. सोयाबीन खरेदीतून एक कोटी ९० लाख ७४ हजार २४० रुपयांची उलाढाल झाली आहे. बाजार समितीने सोयाबीन हमीभाव खरेदी केंद्र सुरू केल्याने शेतकऱ्यांना प्रतिकिलोग्रॅम ९ ते १० रुपये वाढीव बाजारभाव मिळाला आहे. सोयाबीनचे पैसे शेतकऱ्यांच्या बँक खात्यात ऑनलाइन पद्धतीने जमा करण्यात आले आहेत. सोयाबीन नोंदणीला दीड महिन्याची मुदतवाढ मिळाली आहे, अशी माहिती सभापती संजय काळे, सचिव रूपेश कवडे यांनी दिली.

सभापती संजय काळे म्हणाले की, खासगी व्यापाऱ्यांकडून सोयाबीनची खरेदी प्रतवारीनुसार प्रतिकिलोग्रॅम ३५ ते ४५ रुपये या भावाने केली जात होती. सोयाबीनला हमीभाव मिळावा, सोयाबीन खरेदीसाठी बाजार समितीने नाफेड हमीभाव केंद्र सुरू करावे, अशी शेतकऱ्यांची मागणी होती. शासकीय हमीभाव खरेदी योजना २०२५-२६ अंतर्गत महाराष्ट्र राज्य कृषी पणन मंडळाची परवानगी मिळताच जुन्नर कृषी उत्पन्न बाजार समितीच्या वतीने नारायणगाव येथील उप बाजारात नाफेड हमीभाव केंद्र सुरू करून प्रतीक किलोग्रॅम ५३ रुपये २८ पैसे या बाजारभावाने सोयाबीनची खरेदी २९ नोव्हेंबर २०२५ पासून सुरू केली होती. सोयाबीनला हमीभाव मिळाल्याने या योजनेला शेतकऱ्यांचा उत्स्फूर्त प्रतिसाद मिळाला आहे. मागील महिनाभरात नारायणगाव केंद्रात ३५८ टन सोयाबीनची खरेदी झाली आहे. खरेदी केलेले सोयाबीन ५० किलोग्रॅमच्या गोणीत भरून वखार महामंडळाच्या गोडाऊन मध्ये पाठवले आहे. सोयाबीन खरेदीनंतर चौथ्या दिवशी शेतकऱ्यांच्या बँक खात्यात पैसे जमा होतात.

सोयाबीन नोंदणीसाठी १५ डिसेंबर २०२५ पर्यंत अंतिम मुदत होती. मात्र शेतकऱ्यांनी केलेल्या मागणीनुसार नोंदणीसाठी ३१ जानेवारी २०२६ पर्यंत मुदतवाढ मिळाली आहे. नोंदणी केलेल्या शेतकऱ्यांची सोयाबीन १५ फेब्रुवारी २०२६ पर्यंत खरेदी केली जाईल. सोयाबीन नोंदणीसाठी दीड महिना मुदतवाढ मिळाल्याने शेतकऱ्यांना दिलासा मिळाला आहे.
- रूपेश कवडे, सचिव: कृषी उत्पन्न बाजार समिती जुन्नर

07665, 07667