नारायणगाव, ता. ४ : भरधाव वेगाने जाणाऱ्या आयशर टेम्पोची धडक बसून चंद्रकांत विठ्ठल नाईकवाडी (वय ४०, रा. बेल्हे, ता. जुन्नर) यांचा मृत्यू झाला. हा अपघात शुक्रवारी (ता. ३) रात्री साडेआठच्या सुमारास बेल्हा- जेजुरी रस्त्यावर पारगाव तर्फे आळे (ता. जुन्नर) येथे झाला. या प्रकरणी चालक नवनाथ त्रिंबक पवार(रा. चिंचणी, ता. शिरूर) याच्यावर गुन्हा दाखल झाला असून त्याला अटक करण्यात आली आहे, अशी माहिती नारायणगावचे सहाय्यक पोलिस निरीक्षक प्रवीण संपांगे यांनी दिली. चंद्रकांत नाईकवाडी हे पारगाव तर्फे आळे येथे बस स्थानकाजवळ रस्त्याच्या कडेला दुचाकीसह उभे होते. दरम्यान, भरधाव वेगाने मागून आलेल्या टेम्पोची त्यांना धडक बसली. या अपघातात गंभीर दुखापत झाल्याने त्यांचा जागीच मृत्यू झाला.