नसरापूर, ता. २८ : भोर तालुक्यातील गुंजवणी आणि शिवगंगा खोऱ्यात देखील पावसाने धुमाकूळ घातल्याने संपूर्ण शिवार जलमय झाला आहे. शेतकऱ्यांच्या हातातोंडाशी आलेला घासच हिरावल्याने येथील शेतकरी हतबल झाला आहे. शासनाने तातडीने पंचनामा करून शेतकऱ्यांना नुकसानभरपाई देण्याची मागणी करण्यात येत आहे.
गुंजवणी व शिवगंगा खोऱ्यात मॉन्सूनपूर्व पावसाने दमदार हजेरी लावली आहे. यामुळे गुंजवणी खोऱ्यातील सांगवी निधान, माळेगाव, हातवे, सणसवाडी, मोहरी, तांबाड, सोंडे सरपाले भागातील गावे, तसेच शिवगंगा खोऱ्यातील केळवडे, साळवडे, वरवे, शिवरे, खोपी, धनगरवाडी आदी भागातील शेतकऱ्यांचे शेतात पावसाचे पाणीच - पाणी झाल्याने शेतातील उभी पिके आडवी पडली आहे.
शेतात गुडगाभर पाणी साचून राहिल्याने पिके कुजली गेली आहेत. तर शेताच्या बांधाची फुटतूट झाल्याने शेतीचे नुकसान झाले आहे. मोठ्या प्रमाणात शेतजमीन वाहून गेली असून, शेतात पाणी साचल्याने तळ्याचे स्वरूप आले आहेत. कांदा व वैरणी शेतात अडकून पडल्या आहेत.
दरम्यान, भोरचे तहसीलदार राजेंद्र नजन यांनी या बाबत झालेल्या नुकसानीचा पंचनामा करण्यात येणार आहे. कृषी विभागाला तशा सूचना देण्यात आल्या असल्याची माहिती दिली.

भुईमूगला पुन्हा फुटले अंकुर
जोरदार पावसाच्या या तडाख्यामुळे टोमॅटो, भुईमूग, भेंडी, वांगी, कारली, काढणीला आलेले उन्हाळी बाजरी तसेच आंबे या फळ पिकांचे मोठ्या प्रमाणावर नुकसान झाले आहे. तर भुईमुगला पुन्हा अंकुर फुटले आहेत. वाऱ्यासह पाऊस कायम राहिल्याने आंबे गळून पडले असून बाजरीच्या कणसाला देखील पुन्हा अंकुर फुटत आहेत. वीटभट्टी व्यावसायिकांचे देखील मोठ्या प्रमाणावर नुकसान झाले.