खेड शिवापूर, ता. २८ : पुणे शहराला लागून असलेल्या भिलारेवाडी येथे झालेल्या भांडणाच्या रागातून एकास कात्रज घाटाच्या अलीकडे गोगलवाडी (ता. हवेली) चर्तुमुख घाटात बोलावून पाच जणांनी कोयत्याने वार करून गंभीर जखमी केले. याप्रकरणी राजगड पोलिस ठाण्यात गुन्हा दाखल करण्यात आला आहे.
याबाबत हमीद अब्दुल रहेमान पानवाले (वय २२, रा. वाघजाई माता मंदिराशेजारी भिलारेवाडी पुणे, मुळगाव कर्नाटक) यांनी शंकर नामदेव सरोदे (रा. भिलारेवाडी, पुणे) व त्याच्या पाच साथीदारांच्या विरोधात तक्रार दाखल केली आहे.
याबाबत अधिक माहिती अशी की, आरोपी शंकर याने सोमवारी (ता. २६) फिर्यादी हमीद याच्या दुचाकीवर लघुशंका केली. त्यामुळे हमीद व शंकर यांच्यामध्ये भिलारेवाडी येथे वाद झाला. शंकर याने मंगळवारी (ता. २७) हमीदचे नातेवाईक महम्मद शेख यांना त्यांच्याकडील मोबाईल काढून घेऊन जबरदस्तीने रिक्षामध्ये बसवत गोगलवाडी गावच्या हद्दीत चर्तुमुख घाटात नेले. त्यांना कोयत्याचा धाक दाखवून फिर्यादीचा भाऊ रफिक यास फोन करून नवीन काम मिळाले आहे, असे सांगून घाटात बोलाविण्यास सांगितले.
रफिक त्याठिकाणी आल्यावर घाटात लपून बसलेल्या शंकर व त्याच्या पाच साथीदारांनी त्याला कोयत्याने मारहाण करत गंभीर जखमी केले. तसेच त्यांनी रफिकसोबत असलेल्या अन्वर व महम्मद यांनादेखील मारहाण केली. याची माहिती फिर्यादी हमीद यांना समजल्यावर त्यांनी पोलिसांना माहिती दिली. रफिक याच्यावर रुग्णालयात उपचार चालु आहेत. याप्रकरणी राजगड पोलिसांनी शंकर व त्याच्या पाच साथीदारांवर गुन्हा दाखल केला असून फरारी आरोपींचा तपास पोलिस फौजदार अजित पाटील व सहकारी करत आहेत.