नसरापूर, ता. २० : राजापूर (ता. भोर) गावामधील बंद घरात चोरट्यांनी आत प्रवेश करत कपाटातील सोन्या-चांदीचे दागिने असा ८६ हजार ४०० रुपयांचा मुद्देमाल चोरून नेला आहे. शुक्रवारी (ता. १८) सायंकाळी सहा ते शनिवारी (ता. १९) सायंकाळी साडेपाच वाजण्याच्या दरम्यान ही घटना घडली. याबाबत तुषार वसंत मोरे (वय ४०, रा. वानवडी, पुणे, मुळगाव- राजापूर, ता. भोर) यांनी राजगड पोलिस ठाण्यात तक्रार दिली आहे. याबाबत रविवारी (ता. २०) राजगड पोलिस ठाण्यात चोरट्यांविरोधात गुन्हा दाखल झाला. पुढील तपास महिला पोलिस उपनिरीक्षक वृषाली देसाई करत आहेत.