नसरापूर, ता. २६ : पुणे-सातारा महामार्गावर निगडे (ता.भोर) येथे गावच्या हद्दीत राजगड कारखाना उड्डाणपुलाच्या उतारावर भरधाव वाहनाने ठोकर दिली. यामुळे झालेल्या अपघातात किरण हिरालाल पुणेकर (वय ४६, रा. शिरवळ, मूळगाव जवळे, ता. खंडाळा जि.सातारा) या भाजी विक्रेत्या दुचाकीस्वाराचा मृत्यू झाला. ही घटना गुरुवारी (ता. २४) घडली. याबाबत राजगड पोलिस ठाण्यात अज्ञात वाहनचालकाविरोधात गुन्हा दाखल केला आहे.
अपघातप्रकरणी किरण यांचे भाऊ प्रवीण पुणेकर यांनी राजगड पोलिस ठाण्यात तक्रार दाखल केली आहे. किरण दुचाकीवरून (एम एच ११ डी यु २२२७) न भाजीपाला विक्री करण्यासाठी नारायणपूर येथे गेले होते. भाजी विक्री करून रात्री साडेबारा ते एक वाजण्याच्या सुमारास दुचाकीवरून पुन्हा शिरवळ येथे येत होते. त्यावेळी निगडे येथील राजगड कारखाना उड्डाण पुलाच्या उतारावर अज्ञात भरधाव वाहनाने त्यांना ठोकरले. गंभीर जखमी होऊन त्यांचा मृत्यू झाला.
याबाबत अज्ञात वाहन चालकाविरोधात गुन्हा दाखल केला आहे. पुढील तपास पोलिस हवालदार नाना मदने करत आहेत.