न्हावरे, ता.२३ : गौरी शुगर येत्या गळीत हंगामातही ऊसउत्पादक शेतकऱ्यांना चांगला बाजारभाव देऊन त्यांचे हित जोपासणार आहे, अशी माहिती ओंकार शुगर ग्रुपचे संचालक प्रशांत बोत्रे पाटील यांनी दिली.
ओंकार शुगर ग्रुपच्या हिरडगाव (ता.श्रीगोंदा) येथील गौरी शुगर कारखान्याच्या गळीत हंगामाच्या पार्श्वभूमीवर रोलर पूजनप्रसंगी ते बोलत होते. ओंकार शुगर ग्रुप हा अध्यक्ष बाबूराव बोत्रे पाटील यांच्या मार्गदर्शनाखाली मागील दहा वर्षांपासून महाराष्ट्रात विविध ठिकाणी साखर व्यवसायात काम करीत आहे. ऊस उत्पादक शेतकरी, कारखाना कामगार, ऊस तोडणी कामगार वाहतूकदार व पुरवठादार यांचे हित जोपासले जात आहे. दरम्यान, गौरी शुगर कारखान्याने ऊस गाळपाचे नियोजन प्रगतिपथावर असून, ऊस तोडणीसाठी तोडणी-वाहतूक यंत्रणेचे नियोजन केले आहे.
दरम्यान, ऊस उत्पादक शेतकऱ्यांनी आपल्या उसाची नोंद कारखान्याकडे देऊन आपला ऊस गौरी शुगरला द्यावा, असे आवाहन सर्व ऊस उत्पादकांना बोत्रे पाटील यांनी केले. यावेळी हिरडगावचे सरपंच रामदास बनकर, उपसरपंच चिमाजी दरेकर, ऊस उत्पादक शेतकरी, अंबादास दरेकर, तोडणी वहातूक ठेकेदार बाळासाहेब घोलप, राजापुरचे माजी सरपंच सचिन चौधरी आदी मान्यवर उपस्थित होते. प्रास्ताविक कारखान्याचे जनरल व्यवस्थापक रोहिदास यादव यांनी केले.

02305