न्हावरे, ता. ११ : ‘‘शिरूर तालुक्यात दिवसेंदिवस चोरीच्या घटना वाढत असून त्याला आळा घालण्यासाठी गावोगावी ग्राम सुरक्षा यंत्रणा, ग्रामसुरक्षा दल तसेच प्रत्येक गावात सीसीटीव्ही कॅमेरे बसविणे गरजेचे असून यासाठी संबंधित ग्रामपंचायत व सामाजिक संस्थांनी पुढाकार घ्यावा,’’ असे आवाहन शिरूरचे पोलिस निरीक्षक संदेश केंजळे यांनी तालुक्यातील न्हावरे येथे केले.
शिरूर तालुक्यात दरोडे, जबरी चोरी व घरफोड्या आदी गुन्ह्यांचे प्रमाण दिवसेंदिवस वाढत असल्याच्या पार्श्‍वभूमीवर न्हावरे पोलिस ठाण्यांतर्गत परिसरातील पोलिस पाटील, सरपंच व ग्रामस्थ यांच्या सहविचार सभेत ते बोलत होते. कार्यक्रमाच्या अध्यक्षस्थानी सरपंच कमल कोकडे होत्या.
केंजळे पुढे म्हणाले की, प्रत्येक गावात ग्रामसुरक्षा यंत्रणा कार्यान्वित करावी. प्रत्येक गावात ग्रामसुरक्षा दल स्थापन करून त्यांच्याद्वारे गावामध्ये टप्प्याटप्प्याने रात्रीच्या वेळी ग्रस्त ठेवण्याची व्यवस्था करावी, जेणेकरून चोरीच्या घटना होणार नाहीत. त्याचबरोबर गावातील मुख्य रस्ते, प्रवेशद्वारे, बाजारपेठा, शाळा व संवेदनशील ठिकाणी सीसीटीव्ही कॅमेरे बसविण्याबाबत ग्राम स्तरावर उपाययोजना कराव्यात. व्यापारी वर्गाने दुकानांमध्ये कॅमेरा बसविताना तो बाहेरील बाजूस बसवावा, जेणेकरून त्यामध्ये रस्त्यावरील हालचाली कैद होतील. हे कॅमेरे नाईट व्हीजन असलेले असावेत. या सर्व कामांचे योग्य नियोजन व अंमलबजावणी करण्यासाठी ग्रामपंचायत, सामाजिक संस्थानी मदत करावी, असे आवाहन त्यांनी केले.
यावेळी न्हावरे येथील पीएसआय सागर शेळके, राष्ट्रवादी काँग्रेसचे प्रदेश सरचिटणीस राजेंद्र कोरेकर, भाजप प्रदेश सदस्य सुभाष कांडगे, आंबळेचे सरपंच सोमनाथ बेंद्रे, कळवंतवाडीचे सरपंच दादासाहेब चव्हाण, उरळगावचे सरपंच स्वप्नील गिरमकर, रांजणगाव सांडसचे उपसरपंच प्रवीण रणदिवे आदींनी मनोगत व्यक्त केले. याप्रसंगी प्रतिभा रणदिवे, हर्षदा संकपाळ, उपसरपंच सुभाष कोकडे, माजी सरपंच गौतम कदम, सागर राजेनिंबाळकर, अरुण तांबे, सुरेश कोरेकर, तुकाराम गिरमकर आदी उपस्थित होते.

महिलांच्या तक्रारींकडे काणाडोळा
न्हावरे परिसरातील प्रत्येक गावात अवैधरीत्या राजरोसपणे धंदे सुरू आहेत. त्यामुळे गावातील शांततेला गालबोट लागत आहे. याबाबत महिलांच्या मोठ्या प्रमाणात तक्रारी असूनही पोलिस प्रशासन मात्र त्याकडे सोईस्कर काणाडोळा करत असल्याची खंत भाजपचे सुभाष कांडगे व राष्ट्रवादी पक्षाचे राजेंद्र कोरेकर यांनी व्यक्त केली.