न्हावरे, ता. १८ : उरळगाव (ता. शिरूर) परिसरातील आफळेवस्ती येथे शुक्रवारी (ता. १८) मध्यरात्रीच्या सुमारास तीन अज्ञात चोरट्यांनी एका घरात घुसून, महिलेला लोखंडी गजाने मारहाण करत सुमारे दोन लाख ४५ हजार रुपयांचा ऐवज चोरून नेल्याची घटना घडली. या घटनेमुळे परिसरात भीतीचे वातावरण निर्माण झाले आहे.
याप्रकरणी मनिषा हरिदास आफळे (वय २३, रा. उरळगाव-आफळेवस्ती, ता. शिरूर) यांनी शिरूर पोलिस ठाण्यात फिर्याद दाखल केली असून, पोलिसांनी चोरांविरुद्ध गुन्हा दाखल केला आहे. फिर्यादीनुसार, मनिषा यांचे पती कांद्याच्या वाहतुकीचे काम करतात. त्यामुळे गुरुवारी (ता. १७) रात्री ते गुलटेकडी (पुणे) येथे कांदा घेऊन गेले होते. घरात मनिषा त्यांच्या दोन लहान मुलांसह बेडरूममध्ये झोपल्या होत्या व त्यांची सासू दुसऱ्या खोलीत तर सासरे गोठ्यात झोपले होते. मध्यरात्री तीन चोरांनी बेडरूमचा दरवाजा उघडून घरात प्रवेश केला. मनिषा यांना लोखंडी गजाने डोक्यावर मारहाण करून, कपाटातील मंगळसूत्र, गंठण, अंगठी आणि ६५ हजार रुपये रोख रक्कम असा एकूण दोन लाख ४५ हजार रुपयांचा ऐवज चोरून नेला. दोन चोरांनी तोंडाला रुमाल बांधला होता व एकाने मास्क घातला होता. तर तिघांनीही काळ्या रंगाचे जर्किंग घातले होते. तसेच त्यांच्या हातात कोयता व लोखंडी गज होते.
घटनेची माहिती मिळताच शिरूर पोलिस ठाण्याचे पथक घटनास्थळी दाखल झाले. श्वान पथकाच्या मदतीने चोरांचा मागोवा काढण्याचा प्रयत्न करण्यात आला. त्याचप्रमाणे परिसरातील सीसीटीव्ही फुटेजही तपासण्यात येत आहेत. शिरूर पोलिस ठाण्याचे पोलिस निरीक्षक संदेश केंजळे यांच्या मार्गदर्शनाखाली शिरूर व न्हावरे पोलिस पुढील अधिक तपास करीत आहेत.