नीरा नरसिंहपूर, ता. ३० : पुणे परिसरातून येणारे पाणी कमी झाल्याने भीमा नदीतील विसर्ग पाणी कमी करून २० हजार क्यूसेक केले आहे. त्यामुळे गणेशवाडी (ता. इंदापूर) येथील पूल वाहतुकीसाठी खुला झाला आहे.
उजनी धरणातून सोमवारी (ता. २९) सोडले जाणारे एक लाख २५ हजार क्यूसेकच्या विसर्गामुळे पूरपरस्थिती निर्माण झाली होती. धरण शंभर टक्के भरले असून, धरणात एकूण ११७ टीएमसी पाणीसाठा झाला आहे. तसेच, उजनी धरण परिसरात व पुणे घाटमाथ्यावर होत असलेल्या अतिवृष्टीमुळे मोठ्या प्रमाणात पाणी सोडले जात होते. त्यामुळे पूरनियंत्रणाच्या दृष्टिकोनातून मागील तीन महिन्यांपासून भीमा नदी पात्रात सततपणाने पाणी सोडले जात आहे.
भीमा नदीवरील गणेशवाडी- गारअकोले यांना जोडणारा पूल सोमवारी सहाव्यांदा पुराच्या पाण्याखाली गेला होता. त्यामुळे शेतकरी, विद्यार्थी व नागरिकांचे येणे जाणे बंद झाले होते. मंगळवारी पहाटे साडेपाच वाजता नदीतील पाणी कमी करून ५० हजार क्यूसेक केले. त्यामुळे पूल वाहतुकीस खुला झाला आहे. त्याचबरोबर भांडगाव, टणू, नरसिंहपूर येथील बंधाऱ्यावरील पाणी कमी झाले आहे.