ओतूर, ता. ३० : डिंगोरे (ता. जुन्नर) येथील पुष्पावती विद्यालयात शुक्रवारी (ता. २९) राष्ट्रीय क्रीडा दिन साजरा करण्यात आला. यावेळी विद्यालयामध्ये विविध क्रीडा उपक्रमांचे आयोजन केले असून यात विद्यार्थ्यांनी उत्साहाने सहभाग नोंदवला.
याप्रसंगी हॉकीचे जादूगार मेजर ध्यानचंद यांच्या प्रतिमेस पुष्पहार किसन भुतांबरे व जगन्नाथ गाढवे यांच्या हस्ते अर्पण करून कार्यक्रमाची सुरुवात करण्यात आली. मुख्याध्यापक शरद माळवे यांनी क्रीडा दिनाचे महत्त्व स्पष्ट केले. त्यांनी आपल्या मार्गदर्शनातून विविध खेळाडूंची कामगिरी, त्यांच्या जिद्दीची प्रेरणा तसेच खेळामधून मिळणारे आरोग्याचे महत्त्व अधोरेखित केले. क्रीडा स्पर्धांमुळे विद्यार्थ्यांमध्ये शारीरिक तंदुरुस्ती, चिकाटी, सकारात्मक दृष्टिकोन व खेळाडूवृत्ती हे गुण विकसित होतात, असे मत त्यांनी व्यक्त केले.
दररोज व्यायाम करा, पौष्टिक आहार घ्या आणि खेळाला जीवनाचा अविभाज्य भाग बनवा, असा संदेश यानिमित्ताने विद्यार्थ्यांना देण्यात आला. मंगेश कोंडार यांनी कार्यक्रमाचे प्रास्ताविक, तर दीपा सावंत, साधना तांबे, अनुराधा नरवडे, सिंधू गोल्हार, दिनेश पाटील यांनी विविध स्पर्धांचे आयोजन केले. रतिलाल बागूल यांनी आभार मानले.