कवठे येमाई, ता. २६ : अष्टविनायक महामार्गालगत असलेल्या भोर बी-बियाणे दुकानाचा पत्रा उचकटत चोरट्यांनी रोख रक्कमेसह सुमारे ६५ हजार रुपयांचे साहित्य चोरून नेले. ही घटना बुधवारी (ता. २३) रात्रीच्या सुमारास घडली. याबाबत योगेश जिजाभाऊ सैद (वय ३४, रा. गावडेवाडी, ता. आंबेगाव) यांनी शिरूर पोलिस ठाण्यात फिर्याद दिली.
कवठे येमाई येथे अष्टविनायक महामार्गालगत योगेश सैद यांचे भोर बी-बियाण्यांचे दुकान आहे. मंगळवारी सायंकाळी ते दुकान बंद करून घरी गेले होते. बुधवारी सकाळी दुकानात आल्यानंतर दुकानाचा पत्रा उचकटलेला दिसला. त्यांनी आत पाहणी केली असता दुकानातील बी-बियाणे, औषधे, रोख रक्कम व सीसीटीव्हीचे डिव्हीआर मशीन चोरीस गेले असल्याचे लक्षात आले. शिरूर पोलिसांनी चोरट्यांविरुद्ध गुन्हा दाखल केला आहे. पोलिस निरीक्षक संदेश केंजळे यांच्या मार्गदर्शनाखाली पोलिस हवालदार उबाळे तपास करत आहेत.