कवठे येमाई, ता. १९ : शिरूर तालुक्यातील कवठे येमाई परिसरात वाड्या-वस्त्यांवरील शेळ्या-मेंढ्या व पाळीव प्राण्यांवर हल्ले करणाऱ्या बिबट्याने आता थेट गावठाणात प्रवेश केल्याने नागरिकांमध्ये भीतीचे वातावरण पसरले आहे. गुरुवारी (ता. १८) रात्री सुमारे दहाच्या सुमारास गावठाणातील श्री महादेव व श्री गणेश मंदिर परिसरात बिबट्याने एका कुत्र्यावर हल्ला करून त्याला ठार केले. या अगोदर बुधवारी (ता. १७) रात्री मळगंगा मंदिर परिसरात काही नागरिकांना बिबट्याचे दर्शन झाले होते. त्यानंतर दुसऱ्याच दिवशी पुन्हा गावठाणात शिरकाव करत बिबट्याने कुत्र्यावर हल्ला केल्याची घटना घडल्याने ग्रामस्थांमध्ये दहशत पसरली आहे.
कवठे येमाई हे मोठ्या लोकसंख्येचे गाव असून येथील बाजारपेठ उशिरापर्यंत सुरू असते. सध्या थंडीचे दिवस असल्याने अनेक नागरिक रात्री घराबाहेर शेकोटी पेटवून बसलेले असतात. तसेच शेतकरी दूध संकलन केंद्रावर दूध घालण्यासाठी रात्री गावात ये-जा करत असतात. या पार्श्वभूमीवर बिबट्याच्या मुक्त संचारामुळे नागरिकांच्या सुरक्षिततेचा प्रश्न ऐरणीवर आला आहे. या घटनेची माहिती सरपंच मनीषा भोर यांनी वनविभागाला दिली. त्यानुसार वनपरिक्षेत्र अधिकारी निळकंठ गव्हाणे यांच्या सूचनेनुसार वन कर्मचारी नारायण राठोड व वनमजूर हनुमंत कारकुड यांनी घटनास्थळी भेट देऊन पाहणी केली. ग्रामस्थांनी सतर्क राहावे, लहान मुलांना एकटे बाहेर पाठवू नये तसेच ज्येष्ठ नागरिकांची विशेष काळजी घ्यावी, असे आवाहन वनविभागाकडून करण्यात आले आहे. दरम्यान, बिबट्याला जेरबंद करण्यासाठी वनविभागाने तातडीने पिंजरा लावावा, अशी मागणी ग्रामस्थांनी केली आहे.