पाईट, ता १३ : खेड तालुक्यातील गडद विविध कार्यकारी सहकारी सोसायटीच्या अध्यक्षपदी मारुती चिंधू तळेकर यांची, तर उपाध्यक्षपदी कोंडू तुकाराम साबळे यांची दुसऱ्यांदा बिनविरोध निवड करण्यात आली.
या निवडीसाठी राजगुरुनगर येथील कृषी उत्पन्न बाजार समिती सभागृहात विशेष सभेचे आयोजन केले होते. त्या वेळी सोसायटीचे सर्वच्या सर्व १२ संचालक उपस्थित होते.
यापूर्वीचे अध्यक्ष मारुती शिवराम शिंदे व उपाध्यक्ष कोंडू तुकाराम साबळे यांनी ठरल्याप्रमाणे राजीनामा दिल्याने ही दोन्ही पदे रिक्त झाली होती. यातील अध्यक्ष पदासाठी तळेकर यांची व उपाध्यक्षपदाकरिता साबळे यांचा अनुक्रमे एकेक अर्ज आल्याने ही निवड बिनविरोध झाल्याचे निवडणूक निर्णय अधिकारी मिलिंद राऊत यांनी जाहीर केले. या कामात गडद सोसायटीचे सचिव अशोक टाव्हरे यांनी साहाय्य केले.