पाईट, ता. २९ ः लादवड (ता. खेड) गावाजवळ पुलाच्या कामामुळे नव्याने बनवण्यात आलेल्या बाह्यवळण रस्त्यावर चिखलाचा राडारोडा पसरला आहे. त्यामुळे दुचाकी, चारचाकी चालवण्याची कसरत प्रवाशांना करावी लागत आहे.
याबाबत सविस्तर माहिती अशी की, गेल्या ७ महिन्यापासून पाईट- आंबोली मार्गावरील लादवड गावाजवळ नवीन पुलाचे काम सुरू आहे. हे काम अत्यंत संथगतीने सुरू असून, वाहतुकीसाठी नव्याने तयार केलेल्या बायपास काही ठिकाणी अनेकदा खचत आहे. त्यामुळे त्याठिकाणी चिखल होतो. या चिखलावरून दुचाकी, चारचाकी चालवणे प्रवाशांना धोक्याचे ठरत आहे. ठेकेदार या चिखलावर तात्पुरती मलमपट्टी करून वेळ भागवून नेत असल्याचे चित्र आहे. हा बाह्यवळण रस्ता लादवड गावच्या पाझर तलावानजीक केलेला आहे.
मागील महिन्यात याच बाह्यवळण रस्त्यावर पाणी साचल्याने पश्चिम भागातील सुमारे २० गावची वाहतूक पिंपरी बुद्रुक गावातून वळविण्यात आली होती. गेल्या महिनाभरात नवीन पुलावर एका बाजूने भराव टाकलेला असून, दुसऱ्या बाजूचा भराव होणे बाकी आहे. हे काम ठेकेदार अत्यंत संथगतीने करीत असल्याने प्रवासी, ग्रामस्थ नाराजी व संताप व्यक्त करीत आहेत. लवकरात लवकर पुलावरील दोन्ही बाजूच्या भरावाचे काम पूर्ण करून पुलावरून वाहतूक सुरू व्हावी, अशी मागणी ग्रामस्थ करीत आहेत.