पाईट, ता. १६ : येथील कुंडेश्वर मंदिराकडे जाणाऱ्या अवघड वळणावर पिकअपचा सोमवारी (दि. ११) झालेल्या अपघातात उपचारादरम्यान त्याच दिवशी १० महिलांचा मृत्यू झाला होता. तर बुधवारी (ता.१४) चिंचवड येथील खासगी हॉस्पिटलमध्ये सुलाबाई बाळू चोरघे (रा.पापळवाडी-पाईट) या महिलेचा देखील मृत्यू झाल्याने मृतांची संख्या ११ वर पोहोचली होती; मात्र शुक्रवारी (ता. १५) मोशी येथील खासगी हॉस्पिटलमध्ये उपचार घेणाऱ्या लक्ष्मीबाई हरिश्चंद्र कोळेकर(वय ५५ रा. पाईटची पापळवाडी, ता. खेड) या महिलेचा मृत्यू झाल्याने मृतांची संख्या आता १२ वर पोहोचली आहे. त्यामुळे पाईट पापळवाडी परिसरात दुःखाचे सावट आणखी गडद होत असल्याची चर्चा होत आहे .
अपघात घडला त्या दिवशी जखमींची संख्या ३१ होती त्यातील आजअखेर २ महिलांचा मृत्यू झाला त्यामुळे उर्वरित २९ पैकी जयश्री बाळू दरेकर, साई सुभाष डांगले, निकिता वनाजी पापळ, जयश्री वनाजी पापळ,ऋतुराज तुषार कोतवाल, सानवी ज्ञानेश्वर पापळ अशा ६ रुग्णांना घरी सोडण्यात आले आहे. तर उर्वरित २३ रुग्ण अद्यापही विविध हॉस्पिटलमध्ये उपचार घेत असल्याची माहिती पाईट ग्रामपंचायत कार्यालय व युवक अध्यक्ष जयसिंग दरेकर यांनी दिली.