पाईट, ता.२८ : आंभू,गडद (ता.खेड) परिसरात बिबट्याचा सर्रास वावर वाढल्याने येथील ग्रामस्थांमध्ये भीतीचे वातावरण आहे. येथील लक्ष्मण धोंडू शिंदे यांच्या जनावरांच्या गोठ्याबाहेर बांधलेल्या कुत्र्यावर बिबट्याने हल्ला केला होता. मात्र, काल पुन्हा याच ठिकाणी बिबट्या आल्याने ग्रामस्थांमध्ये भीतीचे वातावरण आहे. यापूर्वी तांबडेवाडी येथील गोठ्यातील जनावरांवर देखील हल्ला करून शिकार केली होती. बिबट्याच्या दहशतीमुळे परिसरात भीतीचे वातावरण पसरले आहे. त्यामुळे पिंजरा लावण्याची मागणी ग्रामस्थांकडून होत आहे.
सद्या थंडीचे दिवस सुरू झाले आहेत. अंधारही लवकर पडतो. साधारणपणे दिवे लागणीच्या वेळी बिबट्या हल्ला करीत आहे, असे ग्रामस्थांनी सांगितले. भागात दुग्ध व्यवसाय मोठ्या प्रमाणावर सुरू आहे.त्यामुळे दुधाळ आणि पाळीव जनावरांचे गोठेही मोठ्या प्रमाणात आहेत. या भागात राहणारे ग्रामस्थ शेतीकामासाठी तर तरुण वर्ग सकाळ- संध्याकाळ नोकरीनिमित्त ये-जा करत असतात. बिबट्याचा वावरामुळे वांद्रे गावापासून आंबोलीपर्यंत तर आंभू, गडद या भागात वाढल्याने ग्रामस्थ हैराण आहेत. त्यामुळे वनविभागाने त्वरित पिंजरा लावावा, अशी मागणी वाढत आहे.